ԱՄՆ Կոնգրեսի Ներկայացուցիչների պալատը, որտեղ մեծամասնություն են կազմում հանրապետականները, երեկ հրաժարվել է բարձրացնել ԱՄՆ պետական պարտքի վերին շեմը, որն այս պահին կազմում է 2.4 տրիլիոն դոլար: Այս մասին հաղորդում է Reuters գործակալությունը:
Հանրապետականները սա բացատրում են նրանով, որ անպատասխանատվություն կլինի գնալ այս քայլին՝ հաշվի առնելով, որ պարտքը կրճատելու համար պետական ծրագրերի կրճատումներ առաջարկող նախագծերը մերժվում են Սպիտակ տան կողմից՝ դրանով ավելացնելով պետական բյուջեի պարտքը:
Հիշեցնենք, որ ԱՄՆ ֆինանսների նախարար Թիմոթի Գայթները շաբաթներ առաջ զգուշացրել էր, որ եթե հանրապետականները չեն ցանկանում, որպեսզի ԱՄՆ-ում դեֆոլտ հայտարարվի, և պետությունն էլ չկարողանա իր պարտքերը սպասարկել, ապա անհրաժեշտ է, որ կողմ քվեարկեն պարտքի վերին շեմի բարձրացմանը: Գայթները նաև կարծիք էր հայտնել, որ բացասական որոշման դեպքում տնտեսության մեջ կարող են կրկնվել 1930 թվականների դեպրեսիայի երևույթները:
