Ռուսաստանին և Ադրբեջանին, որպես էներգետիկ շուկայի խոշոր խաղացողների, կարևոր է մշակել համաձայնեցված դիրքորոշում՝ հաշվի առնելով նաև մրցակցությունը: Եվ Ռուսաստանի կառավարությունը դրա համար կանի անհրաժեշտ ամեն ինչ: Ինչպես հաղորդում է RIA Novosti-ն, այս մասին հայտարարել է Ռուսաստանի վարչապետ Դմիտրի Մեդվեդևը Ասիայի և Խաղաղ օվկիանոսի երկրների տեղեկատվական գործակալությունների կազմակերպության գլխավոր ասամբլեայի մասնակիցների հետ հանդիպմանը:
«Ռուսաստանի և Ադրբեջանի միջև լավ հարաբերություններ են, զարգանում է համագործակցությունը բոլոր ուղղություններով: Այդպես եղել է, կա և այդպես կմնա»,- ասել է վարչապետը:
Մեդվեդևի խոսքով՝ դա նկատվում է երկկողմ համագործակցության բոլոր բնագավառներում: «Մենք, իհարկե, ունենք առաջնային նպատակներ, այդ թվում՝ էներգետիկան, և ոչ միայն»,- նշել է նա:
Մեդվեդևը նշել է, որ Ադրբեջանը ևս խոշոր խաղացող է էներգետիկայի շուկայում, և անհրաժեշտ է համաձայնեցված դիրքորոշում մշակել մի շարք հարցերի շուրջ:
«Մենք, իհարկե, որոշ առումով կլինենք մրցակիցներ, սակայն միջազգային մրցակցությունը նորմալ բան է: Հաշվի առնելով պատմական բարիդրացիական հարաբերությունները, որոնք գոյություն ունեն մեր երկրների միջև, և հաշվի առնելով մի շարք տնտեսական խնդիրներով համաձայնեցված գծի անհրաժեշտությունը՝ կարծում եմ, որ կարող ենք պայմանավորվել: Ամեն դեպքում՝ Ռուսաստանի կառավարությունը կանի իրենից կախված ամեն ինչ»,- ասել է նա:
