ՀՀԿ գործկոմի երեկ տեղի ունեցած նիստից առաջ լրագրողների հարցին, թե արդյոք փոխվե՞լ է իր վերաբերմունքը Մաքսային միության վերաբերյալ, Հայաստանի վարչապետ Տիգրան Սարգսյանը պատասխանել է՝ ոչ: Իսկ հարցին, թե արդյոք անակնկա՞լ է եղել Սերժ Սարգսյանի հայտարարությունը Մոսկվայում, ևս տրվել է «ոչ» պատասխանը: Սա կարող է նման լինել շատ հետաքրքրական խոստովանության: Խոստովանության այն մասին, որ Տիգրան Սարգսյանը հոգեբանորեն պատրաստվում է վարչապետի պաշտոնը թողնելուն:
Սա, իհարկե, չի նշանակում, որ այդ բանն անպայման տեղի կունենա, սակայն ամենայն հավանականությամբ կարող է լինել ակնարկ այն բանի, որ հարցը այսօր օրակարգում կա, և հնարավոր է Տիգրան Սարգսյանի համար բացասական հանգուցալուծում տեղի ունենա, ինչին էլ պատրաստվում է վարչապետը: Ինչպես հայտնի է, նա Մաքսային միությանը Հայաստանի անդամակցությունը նպատակահարմար չէր համարում ընդհանուր սահմանների բացակայության պատճառով: Սարգսյանը իր հայտնի հոդվածում նույնիսկ հայտարարել էր, որ Հայաստանի համար ավելի շահավետ է ինտեգրումը եվրոպական ուղղությամբ:
Սահմանները ընդհանուր չեն, իսկ Հայաստանը անդամակցում է Մաքսային միությանը: Եվ այս փաստից հետո Տիգրան Սարգսյանը հայտնում է, որ իր մոտեցումը չի փոխվել: Վաղը գուցե նա հայտարարի, որ մոտեցում ասելով` նկատի չունի բուն անդամակցության վերաբերյալ ասվածը, կամ որ սահմանի հարցում եկել են ինչ-որ փոխզիջումային տարբերակների: Այսինքն` վարչապետը վաղը ինչ-որ բան կարող է մոգոնել և ասել ի արդարացում իր վիճակի, իր «այո»-ի կամ «ոչ»-ի:
Սակայն խնդիրն այստեղ այն է, որ նա, ըստ էության, հող է թողնում նահանջի համար, որպեսզի երբ վարչապետի պաշտոնից հեռացվի, ընկալվի արդեն որպես սկզբունքային գործիչ, որը մնաց իր կարծիքին և չկառչեց պաշտոնից: Եվ հենց սրա համար էլ Տիգրան Սարգսյանը հայտարարում է մոսկովյան հայտարարությունների անակնկալ չլինելու մասին: Այսինքն` նա ցույց է տալիս,- «սև օրվա» համար,- որ գիտակցված է մնում իր կարծիքին, չնայած լավ էլ տեղեկացված է եղել քաղաքական շրջադարձերի մասին:
Իսկ վարչապետի փոփոխության վերաբերյալ դեռևս սեպտեմբերի 3-ից հետո տեղեկություններ եղան մամուլում, որ Ռուսաստանը Մաքսային միություն Հայաստանը քաշելուց հետո ցանկանում է բարձրացնել նաև վարչապետի հարցը` դժգոհ լինելով Տիգրան Սարգսյանից, որը քաջություն էր ունեցել Ռուսաստանի համար անախորժ կարծիքներ հայտնել Մաքսային միության վերաբերյալ: Այսուհանդերձ, կրկնում ենք, որ սա դեռ չի նշանակում փոփոխություն, բայց որ հարցն օրակարգում առկա է, կարծեք թե բավական ակնհայտ է դառնում:
