Գյուղացին ինքը պետք է շահագրգռված լինի և ցանկանա մտնել կոոպերատիվների մեջ, հակառակ դեպքում կոոպերատիվների ձևավորման ուղղությամբ կառավարության քայլերը կդատապարտվեն ձախողման։ Այս կարծիքին է տնտեսագետ Վահագն Խաչատրյանը։
«Գյուղացին պետք է հսականա, թե կոոպերատիվի մեջ մտնելով՝ ինքը ինչ է ստանալու։ Պետք է կարողանաս բացատրել, որ քո ծախսերը քչանալու են, միասնական տեխնիկա ես օգտագործելու, ավելի հեշտ է լինելու քիմիկատների և պարարտանյութերի ձեռբերումն ու օգտագործումը, մի խոսքով՝ տնտեսական արդյունավետությունը պետք է բացատրել»,- նշեց Վ.Խաչատրյանը։
Նրա խոսքով՝ կոոպերատիվները պետք է այնպես ստեղծվեն, որ կառավարվեն բացառապես դրանց կազմ մտած գյուղացիական տնտեսությունների կողմից։ «ԽՍՀՄ-ում սկզբում այդպես էր, բայց հետո գյուղացիական տնտեսություններում մի հսկայական ադմինիստրացիա ձևավորվեց, ինչը, բնականաբար, չափազանց անցանկալի է»,- ասաց Վ.Խաչատրյանը։
