Կահիրեի մետրոյում այսօր երկու ռումբ է հայտնաբերվել: Դրանք հայտնաբերվել են քաղաքի հարավի կայարանում: Այս մասին հայտնում է France-Presse գործակալությունը՝ հղում անելով իշխանության անանուն ներկայացուցիչներին:
Իրավապահ մարմինները դադարեցել են երթևեկությունը մի քանի ուղղություններով: Մասնագետներն ուսումնասիրում են ճանապարհներն ու կայարանները՝ փորձելով համոզվել, որ այլ ռումբեր չկան:
Հաղորդվում է, որ սակրավորներին արդեն հաջողվել է վնասազերծել հայտնաբերված ռումբերը: Reuters-ը նշում է, որ դրանք եղել են երկու պարզունակ պայթուցիկ սարքեր: Գործակալությունը նաև գրում է, որ ռումբերը հայտնաբերվել են ոչ թե քաղաքի հարավում, այլ հյուսիս-արևելքում՝ «Հելմեյեթ Ալ-Զայթուն» կայարանում:
Այն մասին, թե ով կարող է տեղադրած լինել ռումբերը, ոչինչ չի հաղորդվում:
Տեղեկանում ենք նաև, որ եգիպտական զորքերն ու ոստիկանությունը գործողություն են սկսել իսլամիստների դեմ Կահիրեից ոչ հեռու գտնվող Կիրդաս բնակավայրում, հայտնում է Եգիպտոսի պետական MENA գործակալությունը: Անվտանգության ծառայությունների աղբյուրի փոխանցմամբ՝ գործողության ընթացքում ոստիկանության բարձրաստիճան սպա է զոհվել, ևս մեկ զինվոր վիրավորվել է: Ցամաքային գործողությանը աջակցում են ռազմական ուղղաթիռները:
Ավելի վաղ Կիրդաս շրջանն իրենց վերահսկողության տակ էին վերցրել իսլամիստները, իսկ այժմ իշխանությունները փորձում են նրանց դուրս մղել:
