«Հրապարակ» թերթը գրում է. «Մաքուր Երևան» նախաձեռնումից, աղբահանության հարցերից հետո վարչապետ Կարեն Կարապետյանն անցավ տաքսիստների «թրաշին», «տապըչկեքին» ու, առհասարակ, արտաքին տեսքի պրոբլեմին։ Սա արվում է հանուն զբոսաշրջության զարգացման։ Թեև «անթրաշ» ու սիգարետը բերանին վարորդները տեղացիներին էլ են հոգնեցրել, բայց մենք ո՞ւմ բողոքենք։ ՀՀ քաղաքացիներին որակյալ ծառայությունների մատուցումը, ի տարբերություն տուրիզմի խրախուսման, կառավարության առաջնահերթություններից չէ։ Իհարկե, տեղացիներին հեշտ չէ խաբելը:
«Ես ողջունում եմ ոստիկանապետի արարքը։ Նա հետ է վերցնում վարորդական վկայականները, իսկ տրանսպորտի նախարարությունն ապօրինի լիցենզիաներ է տրամադրում։ Ուրիշ ի՞նչ կարա անի։ Նախարարությունը լիցենզիա է տալիս գժերին ու նարկոմաններին»,- վստահեցնում է «Տաքսիստների պաշտպանության լիգայի» նախագահ Տիգրան Հովհաննիսյանը։
«Իհարկե, համարում եմ, որ վարչապետը տեղին է նկատել։ Մենք նույնպես երբեմն հանդիպում ենք նման վարորդների։ Պարզապես պետք է այդպիսի պահանջ լինի, թե ինչպես ներկայանալ ուղևորին։ Ուղղակի վարչապետը պետք է նկատի ունենա միշտ, թե ոստիկանությունն ինչպես կարող է իրականացնել այդ ցուցումը։ Ոստիկանապետը խիստ յուրովի կըմբռնի «կոշտ վերաբերմունք» ասվածը, ու առաջիկայում կլսենք նաև տաքսիստների վերաբերյալ բռնի վերաբերմունքի մասին։ Ոստիկանապետն այդ տաքսիստներին, միևնույև է, նայում է որպես հանցագործների, նախկին դատվածների։ Չի նայում որպես մարդկանց։
Հանրապետության 50 տոկոսը տաքսի ծառայությունում է աշխատում ստիպված, այլ ելք չունենալով, և հիմա պետք է սկսի հանցագործներ որսալ։ Բայց դրանք մարդիկ են, այո, հաճախ իրենց տեսքին չհետևոդ, իսկ այդ սովետական մտածողությունը՝ նախկին հանցագործներ և այլն, չի լքում ոստիկանությանը ոչ մի կերպ։ Լավ կլիներ, որ ոստիկանապետն ազատվեր իր կայուն հոգեբանական մոտեցումներից»,- ասում է իրավապաշտպան Ժաննա Ալեքսանյանը։
Առավել մանրամասն՝ թերթի այսօրվա համարում:
