Իսրայելական Mignews.com կայքի փոխանցմամբ, Թուրքիայի կառավարությունը քննարկում է Թել Ավիվից իր դեսպանին հետ կանչելու հարցը, որին պլանավորում են ուղարկել Ավստրիա։
Միևնույն ժամանակ Ստամբուլում կայացել է հակաիսրայելական զանգվածային ցույց, որը նվիրված էր «Մավի Մարմարայի» միջադեպի տարելիցին, երբ սպանվեցին 9 թուրքեր։ Ցույցին մասնակցել է մոտ 30,000 մարդ, որոնք «զինված» են եղել պաղեստինյան դրոշներով։
Ցույցը կազմակերպել է թուրքական IHH իսլամական կազմակերպությունը, որը խոստանում է հունիսի վերջին նոր «Ազատության նավատորմ» առաքել Գազայի հատված։
Հիշեցնենք, որ նախորդ տարվա մայիսի 31-ին գրանցված «Մավի Մարմարա»-ի միջադեպից հետո նշվում էր, թե «Ազատության նավատորմի» արշավն անձամբ արտոնել էր վարչապետ Էրդողանը Թուրքիայի ներսում սեփական քաղաքական ռեսուրսը հզորացնելու և մուսուլմանական աշխարհում Թուրքիայի առաջատարությունն ապահովելու համար:
Էրդողանի և IHH «իրավապաշտպան» կազմակերպության ներկայացուցիչների կապերի մասին է խոսում այն հանգամանքը, որ IHH գրոհայինները «Մավի Մարմարա» նավ են բարձրացել ոչ թե Անթալիայում, այլ Ստամբուլում, ընդ որում, առանց անվտանգության վերահսկման: Խոսքը մարզված գրոհայինների լավ կազմակերպված խմբի մասին էր և ոչ թե առանձին ակտիվիստների, որոնք տրամադրված էին միայն ինքնապաշտպանության։
