Հյուսիսային Կորեան դատապարտել է ԱՄՆ-ի կողմից անցկացված՝ միջմայրցամաքային բալիստիկ հրթիռ որսալու փորձարկումները, և հայտարարել, որ իր միջուկային զենքը որսալ չի հաջողվի։
Ինչպես հայտնում է «Ռենհապ» գործակալությունը՝ հյուսիսկորեական Ռազմավարական ուժերի ներկայացուցիչն անվանել է Վաշինգտոնի անցկացրած փորձարկումները լուրջ սադրանք։ Նա նաև նշել է, որ ԱՄՆ-ը սխալվում է՝ կարծելով, որ նման որսը կարող է կանխել Հյուսիսային Կորեայի Ռազմավարական ուժերի «միջուկային հարվածների տարափը»։
«Նման ռիսկային քայլը նշան է, որ Հյուսիսային Կորեայի դեմ միջուկային պատերազմի սանձազերծման նրանց նախապատրաստությունն անցել է եզրափակիչ փուլ»,-հավելել է ներկայացուցիչը։
ԱՄՆ պաշտպանության նախարար Ջեյմս Մետիսը հայտարարել է, որ Հյուսիսային Կորեան ակտիվացրել է միջուկային զենքի մշակման ջանքերը՝ փոխանցում է Associated Press-ը։ Ավելի վաղ Պենտագոնի ղեկավարը հայտարարել էր, որ ԱՄՆ-ը կշարունակի ճնշում գործադրել Հյուսիսային Կորեայի վրա։
