Եվրոպական միությունն, անդրադառնալով ադրբեջանցի լրագրող Աֆղան Մուխտարլըի ձերբակալությանը, կոչ է արել հարգել մարդու հիմնարար ազատությունները:
Այս մասին հայտնում է ադրբեջանական azadliq.info լրատվական գործակալությունը:
«Մենք ակնկալում ենք, որ այս միջադեպը Վրաստանի և Ադրբեջանի կառավարությունների ստանձնած միջազգային պարտավորություններին համահունչ կենթարկվի արդյունավետ և թափանցիկ հետաքննության»,- նշվում է Եվրամիության հայտարարության մեջ:
Եվրոպական միության արտաքին գործերի կոմիսար Ֆեդերիկա Մոգերինին «Ազատություն ռադիոկայանի» ադրբեջանական ծառայության հետ զրույցում անդրադառնալով Վրաստանում առևանգված և Ադրբեջան տեղափոխվելուց հետո ձերբակալված Աֆղան Մուխտարլըի գործին ասել է. «Մենք լուրեր ենք ստացել, որ Վրաստանում բնակվող և գործունեություն ծավալող լրագրող Աֆղան Մուխտարլըն ապօրինաբար առևանգվել և առանց որևէ ապացույցի ձերբակալվել է Ադրբեջանում»:
«Ցանկացած անձի, առանց վկայության և ապացույցի ձերբակալելը հակասում է մարդու իրավունքների միջազգային նորմերին, ինչը դատապարտելի է: Մարդու իրավունքների համընդանուր հռչակագրում պարզ նշված է, որ չի կարելի որևէ մեկին առանց ապացույցի ձերբակալել կամ աքսորել»,- հավելել է Եվրամիության արտաքին գործերի կոմիսարը:
Ֆեդերիկա Մոգերինին նշել է, որ մարդու հիմնարար ազատությունները, քաղաքական և քաղաքացիական իրավունքներն ապահովելը այս պարագայում, և Ադրբեջանի, և Վրաստանի պարտականությունն է:
Աֆղան Մուխտարլին հայտնի է որպես ադրբեջանական իշխանությունների վարած քաղաքականության քննադատ: 2015 թվականից ի վեր ստիպված է եղել բնակություն հաստատել Թբիլիսիում: Օրերս նա անհետացել էր, ինչի կապակցությամբ ընտանիքը դիմել էր ոստիկանություն: Ավելի ուշ նա հայտնվել էր Բաքվում և ձերբակալվել: Նա հայտարարել է, որ Թբիլիսիի կենտրոնից իրեն առևանգել են քաղաքացիական հագուստով անհայտ անձինք, ովքեր խոսում էին վրացերեն: Նրան նստեցրել են մեքենա և դուրս բերել Վրաստանից, ապա դաժան ծեծի են ենթարկել, կապել աչքերը և տեղափոխել մեկ այլ մեքենա, իսկ ադրբեջանական սահմանին կրկին տեղափոխել են երրորդ մեքենա, որում արդեն խոսել են ադրբեջաներեն: Մեքենայում նրա գրպանում խոշոր չափի գումար են դրել, և այժմ Ադրբեջանի իշխանությունները նրան մեղադրում են գումարի ապօրինի տեղափոխման և սահմանը հատելու մեջ:
Լրագրողի փաստաբանն արդեն հանդիպել է նրան և փաստել, որ քթի և ճակատի հատվածում երևում են ծեծի հետքեր, աչքերի տակ կապտուկներ են: Աֆղանն ասել է, որ կրծքավանդակում ուժեղ ցավեր ունի, կարծում է, որ կողի կոտրվածք է ստացել:
Սաբաիլի շրջանային դատարանը Թբիլիսիից առևանգված ադրբեջանցի լրագրող Աֆղան Մուխտարլիի նկատմամբ որպես խափանման միջոց է ընդունել երեք ամսով կալանքը:
Մուխտարլիի առևանգման գործով մտահոգություն են հայտնել Վրաստանի պատկան մարմինները, այդ թվում և երկրի նախագահ Գեորգի Մարգվելաշվիլին:
