Ադրբեջանի իշխանություններին վրդովեցրել է Կիպրոսի արտգործնախարարի հայտարարությունը արցախյան հակամարտության կարգավորման վերաբերյալ:
Նշենք, որ ՀՀ պաշտպանության նախարարը պաշտոնական այցով գտնվում է Կիպրոսում, որի շրջանակներում հանդիպում է ունեցել նաև այդ երկրի ԱԳ նախարար Իոաննիս Կասուլիդեսի հետ: Հանդիպման ընթացքում քննարկվել են նաև արցախյան և կիպրոսյան հիմնախնդիրները։ Կիպրոսի արտգործնախարարի համոզմամբ՝ սխալ է զուգահեռներ անցկացնելը երկու այս խնդիրների միջև, քանի որ, իր տարբերություն Հյուսիսային Կիպրոսի, որը բռնազավթվել է Թուրքիայի կողմից, Արցախը հայերի պատմական տարածքն է, նրանք այնտեղ միշտ են եղել, պայքարել են իրենց անվտանգության համար և անկախություն հռչակել։
Ադրբեջանի ԱԳՆ-ի պաշտոնական ներկայացուցիչ Հիքմեթ Հաջիևը, անդրադառնալով Կիպրոսի ԱԳ նախարարի հայտարարությանը, նշել է, որ այն իբրև թե վնասում է ԵԱՀԿ Մինսկի խմբի համանախագահների խաղաղ ջանքերին՝ ուղղված արցախյան հակամարտության կարգավորմանը: «Այդ հայտարարությունը անհամատեղելի է նաև ԵՄ-ի, ԵԱՀԿ-ի, Եվրոպայի Խորհրդի դիրքորոշման հետ, որոնց անդամ է Կիպրոսը»,-հավելել է Հաջիևը:
Նա նաև ընդգծել է, որ «Հյուսիսային Կիպրոսում դարեր շարունակ ապրել են թուրքեր, որոնք ևս ինքնորոշման իրավունք ունեն»:
Ադրբեջանի ԱԳՆ-ի պաշտոնական ներկայացուցիչն ասել է, որ Կիպրոսի և Հայաստանի միջև ռազմական համագործակցությունը «որոշակի հարցեր և կասկածներ են առաջացնում»:
