Նիդերլանդների թագավոր Վիլեմ-Ալեքսանդերն այսօր պաշտոնապես կբացի քաղաքական նոր սեզոն՝ ելույթով դիմելով խորհրդարանին ու կառավարությանը: Ավանդույթի համաձայն՝ միապետի ամենամյա ուղերձն արվում է սեպտեմբերի երրորդ երեքշաբթին, որը կրում Պրինսիեսդահ (Արքայազնների օր) անվանումը: Վիլեմ-Ալեքսանդրի համար, որը գահ է բարձրացել այս տարվա ապրիլի 30-ին, սա կլինի առաջին ելույթը: Պետության ղեկավարը ելույթում նշում է առաջիկա 12 ամիսների քաղաքական, տնտեսական և սոցիալական առաջնահերթությունները:
Ամենամյա այս արարողությունը փողոցներում հավաքում է հազարավոր հանդիսականների, միլիոնավորների էլ՝ հեռուստացույցների էկրանների մոտ: Չնայած օրը պաշտոնապես տոնական չի համարվում, սակայն Հաագայում դպրոցականներն ազատվում են պարապմունքներից:
Միջոցառումն անցկացվում է անվտանգության բարձր միջոցառումների պայմաններում: Հաագայի ողջ կենտրոնը փակ կլինի երթևեկության համար:
Թագավորը ելույթ կունենա հնագույն Ասպետական սրահում՝ խորհրդարանի երկու պալատների պատգմավորների, կառավարության անդամների ու օտարերկրացի դիվանագետների առջև, որից հետո Նիդերլանդներում նոր խորհրդարանական նստաշրջանը կհամարվի պաշտոնապես բացված:
