Արմավիրի մարզում կարկտահարությունից հետո բանկերը և վարկային կազմակերպությունները ըմբռնումով են մոտեցել գյուղացիական տնտեսությունների վիճակին, բավական աշխատանքներ են կատարել: Սեպտեմբերի 17-ին ԱԺ-ում Արմավիրի մարզում կարկտահարությունների հետևանքների վերացման ուղղությամբ կատարված աշխատանքների ամփոփման թեմայով հրավիրված լսումների ժամանակ ասաց ՀՀ Կենտրոնական բանկի խորհրդի անդամ Արթուր Ստեփանյանը: Նա նաև նշեց, որ ԿԲ-ում գործում է թեժ գիծ, որին իրենց հուզող հարցերով դիմում են գյուղացիական տնտեսությունները՝ որոշակի խնդիրների լուծումներ ստանալու համար: «Բանկերի կողմից 4908 գյուղվարկեր են վերանայվել, արտոնյալ պայմաններով նոր լրացուցիչ 247 վարկ է տրվել. սրանք օգոստոսի վերջի տվյալներն են: Վարկերից 1020-ը տոկոսադրույքի նվազմամբ և արտարժույթի փոփոխությամբ է տրամադրվել, ԿԲ թեժ գծով 169 բողոքներ ու պարզաբանումներ են ստացվել, դրանցից 122-ն այսօր ավարտված են, 47-ն ընթացքի մեջ են»,- ասաց նա:
Ա.Ստեփանյանը տեղեկացրեց, որ թեժ գծով ստացվող բողոքներին, ահազանգերին անհատական մոտեցում է տրվում, խնդիրներ հնարավոր են միայն կապված աշխատանքի ժամկետների հետ: ԿԲ խորհրդի անդամը տեղեկացրեց, որ 35 մլրդ դրամի չափով սուբսիդավորված վարկեր են տրվել: Հակառակ պատգամավորների պնդումներին՝ գյուղացուն վարկախեղդ են անում, Ստեփանյանը նշեց, որ գյուղացուն բանկերը 14 տոկոսով են վարկ տալիս, իսկ դա այսօր գոյություն ունեցող ամենացածր տոկոսադրույքն է:
«Վարկերը տրամադրվում են 14 տոկոսով, սակայն քանի որ կառավարությունը սուբսիդավորում է, սահմանամերձ գոտում բնակվող գյուղացին վճարում է 8 տոկոս, իսկ ոչ սահմանամերձ գոտու բնակիչները՝ 10 % տոկոսադրույք»,- ասաց նա: ԲՀԿ-ական պատգամավոր Լյովա Խաչատրյանը պահանջեց իրեն տրամադրել հիսուն խոշոր տնտեսվարողների ցանկը, ովքեր վարկ են վերցրել, ինչին Ստեփանյանը պատասխանեց, որ դեռ տեղյակ չէ՝ կարելի՞ է նման տեղեկատվություն տրամադրել, թե՞ այն գաղտնի է:
Արմավիրի մարզպետ Աշոտ Ղահրամանյանը տեղեկացրեց, որ գյուղացիական համայնքներին մեծ օգնություն է ցուցաբերվել: Արմավիրի 46 համայնքներից 23-ը կարկուտից տուժել են հարյուր տոկոսով, մյուսները՝ մինչև 70-80: Հարյուր տոկոսով տուժած համայնքների հողի հարկը ծածկվել է ամբողջությամբ, իսկ մյուսներինը՝ 50 տոկոսով: Նույն կարգով նաև օժանդակել են ջրային տնտեսություններին՝ դրանց համար հատկացնելով 650 մլն դրամ: 240 մլն դրամ հատկացվել է 6000 գյուղացիական տնտեսությունների: