Արմավիրի մարզի ընդհանուր իրավասության դատարանում Արթուր Ադամյանի նախագահությամբ ընթանում է Գարեգին Գրիգորյանի գործի դատական քննությունը:
Դալարիկ գյուղի 22-ամյա բնակիչ Գարեգինը 2013 թվականի հուլիսի 13-ին, ժամը 11-ի սահմաններում Վանանդ գյուղի դաշտերում խոշոր եղջերավոր անասուններ է արածեցրել: Նույն դաշտում խոշոր եղջերավոր անասուններ է արածեցրել նաև Վանանդ գյուղի բնակիչ Մկրտիչը:
Ըստ մեղադրանքի՝ Մկրտիչի կողմից արածեցվող անասունները գնացել ու խառնվել են Գարգինի նախրին: Գարեգինը պահանջել է, որ Մկրտիչն իր նախիրը դուրս բերի տվյալ արոտավայրից: Բայց Մկրտիչը հրաժարվել է: Նրա անասուններն այդ արոտավայրում էլ իրենց վատ չեն զգացել:
Նախրապանները վիճել են: Գարեգինը, առաջադրված մեղադրանքի համաձայն, գտնվելով Մկրտիչից 4-5 մետր հեռավորության վրա, քարը վերցրել ու հարվածել է Մկրտիչի գլխին՝ պատճառելով գանգուղեղային փակ վնասվածք՝ ծոծրակոսկրի գծային կոտրվածքով անցում դեպի գանգի հիմք: Մկրտիչի առողջությանը պատճառվել է կյանքին վտանգ սպառնացող ծանր վնաս:
Գարեգին Գրիգորյանին մեղադրանք է առաջադրվել ՀՀ քրեական օրենսգրքի 112 հոդվածի 1-ին մասով:
Նա ներկայումս «Նուբարաշեն» ՔԿՀ-ի կալանավոր է:
