Մասաչուսեթսի տեխնոլոգիական ինստիտուտի հետազոտողները սովորեցնում են ռոբոտներին օգնություն խնդրել՝ հայտնում է IEEE Spectrum-ը: Ուսուցման համար կիրառվում են մանիպուլյատորով youBot բջջային ռոբոտները, որոնք հարմարեցված են IKEA-ի կահույք հավաքելու համար: Նախագծի համաձայն՝ չնախատեսված որևէ վիճակում հայտնվելու դեպքում, երբ ռոբոտը չի կարող ինքնուրույն կատարել հանձնարարությունը, այն պետք է կարողանա օգնություն խնդրել:
Մինչ այդ ռոբոտը պետք է ինքնուրույն որոշի առաջացած դժվարության բնույթը, դասակարգի այն, հետո նոր միայն հասկանալի և պարզ ձևով մարդկային օգնություն խնդրի:
Խնդրանքը ռոբոտը կհնչեցնի ձայնով: Օգնություն ստանալով՝ ռոբոտները կարող են շնորհակալություն հայտնել և շարունակել հանձնարարության կատարումն ինքնուրույն: Հետագայում այդ համակարգը թույլ կտա կատարելագործել, մասնավորապես, արտադրությունում ներգրավված ռոբոտների աշխատանքը, քանի որ օպերատորները ստիպված չեն լինի պարզել ձգձգումների պատճառը: