Քիչ անց ֆուտբոլի Եվրոպայի լիգայի եզրափակիչում «Մանչեսթեր Յունայթեդ»-ը մրցելու է «Այաքս»-ի հետ: Խաղը, որի ֆավորիտը համարվում է «Մանչեսթեր»-ը, մեծ հետաքրքրություն է առաջացրել աշխարհում, նաև մեր ֆուտբոլասերների շրջանում, որովհետև անգլիական հեղինակավոր ակումբի կազմում հանդես է գալիս մեր հավաքականի ավագ Հենրիխ Մխիթարյանը:
Սակայն մայիսի 22-ին «Մանչեսթեր Արենայում» տեղի ունեցած ահաբեկչությունից հետո խաղի նկատմամբ հետաքրքրությունը, ընդ որում` արդեն ոչ միայն մարզական, ավելի է մեծացել: Ահաբեկչության թիրախ են դառնում զարգացած երկրներն` իրենց քաղաքակրթական ձեռագրով, մշակութային դեմքով, տոլերանտ համակարգերով: Ահաբեկիչները հատկապես թիրախավորում են արևմտյան քաղաքակրթական համակարգն ու տոլերանտությունը, որովհետև դրանց գրավչությունն ի չիք է դարձնում ծայրահեղականության, արմատականության լեգիտիմացման ամենափոքր հնարավորությունն անգամ:
Օրեր առաջ ահաբեկչության թիրախ դարձավ Մանչեսթերը, որի արևմտյան, բայց ինքնատիպ դիմագծի կարևոր գույն, բաղկացուցիչ է «Մանչեսթեր Յունայթեդ» ակումբը` իր հարուստ պատմությամբ, մրցակցությունը գնահատող և այդ մրցակցությունում հաղթող բնավորությամբ: Մանչեսթերի ֆուտբոլային ակումբի այսօրվա փառքը` արդար մրցակցությունում նրա տարած բազնաթիվ հաղթանակների, նվաճած տիտղոսների դրսևորումն է: Այլ խոսքով` «Մանչեսթեր»-ն ազատ և արդար մրցակցության խորհրդանիշն է, կրողն այն արժեքների, որոնց օրեր առաջ մարտահրավեր նետեց «Իսլամական պետություն» ահաբեկչական խմբավորումը:
«Մանչեսթեր»-ն այսօր դատապարտված է հաղթանակի ու դա կլինի ոչ այնքան ֆուտբոլային ակումբի, որքան` ահաբեկչությունից խոցված Մանչեսթերի, Ագլիայի, Եվրոպայի պատասխանը ահաբեկչության նետած մարտահրավերին: Գուցե հոլանդական «Այաքս»-ը նույնպես արժանի է հաղթանակի, սակայն Եվրոպային այսօր պետք է ոչ այնքան մարզական, որքան` քաղաքակրթական հաղթանակ:
