Թուրքական Hürriyet թերթի փոխանցմամբ, Թուրքիայում ձերբակալվել է Թուրքիայի զինված ուժերի ռազմական ակադեմիաների հրամանատար, բանակի գեներալ Բիլգին Բալանլըն, որը երեկ հերթական անգամ կանչվել էր դատախազություն՝ 2003 թվականին պլանավորված Balyoz ռազմական հեղաշրջման դատավարության շրջանակում ցուցմունքներ տալու համար։
Նրա նկատմամբ հարուցվել է «Ուժի և բռնության միջոցով Թուրքիայի Հանրապետության կառավարությունը տապալելու» մեղադրանք։ Երեկ առավոտյան ժամը 10:00-ին ցուցմունքներ տալու համար նա կանչվել էր Ստամբուլի Բեշիքթաշի դատարան։ Վերջինս նրան հարցաքննել էր 3.5 ժամ, ապա ժամը 13:30-ին Բալանլըին ձերբակալելու միջնորդությամբ դիմել է Ստամբուլի 14-րդ ծանր հանցագործությունների դատարանին, որն էլ մի քանի ժամվա քննարկումներից հետո բավարարել էր այդ միջնորդությունը։
Արդյունքում, Բալանլըն երեկ 9 ժամ է անցկացրել դատարանում։
Հիշեցնենք, որ 2010 թվականի հունվարի 20-ին Taraf թերթը հրապարակեց 2003 թվականին պլանավորված Balyoz ռազմական հեղաշրջման պլանի մանրամասների վերաբերյալ մի հոդված:
Զինված ուժերի 162 սպաների, այդ թվում՝ նաև 29 գեներալների կողմից հավանության արժանացած այդ պլանի համաձայն, նախատեսված էր երկրում հայտարարել արտակարգ դրություն և քաոսի ու բռնության մթնոլորտի ստեղծման ճանապարհով հեղաշրջման կազմակերպման համար համապատասխան հիմք ստեղծել:
Հեղաշրջումից հետո զինվորական վերնախավը պլանավորում էր ձերբակալել նվազագույնը 200,000 մարդու, որոնք մեղադրվելու էին արմատականության մեջ: Ընդ որում, դրանում կասկածվող անձանց ունեցվածքը բռնագանձվելու էր թե՛ երկրի ներսում, թե՛ երկրից դուրս: Հալածանքների էր ենթարկվելու 16 միլիոն մարդ: 81 նահանգապետերից 23-ը պետք է հեռացվեին զբաղեցրած պաշտոններից:
Նախատեսված էր նաև զինվորական ղեկավարության այն ներկայացուցիչների գործողությունների վերահսկումը, որոնք չեն աջակցում հեղաշրջման գաղափարին և քաղաքականությանը զինվորականների միջամտելուն: Դրա համար էլ նախատեսվում էր Հիլմի Օզքյոքի հրաժարականը:
Զինվորականները պլանավորել էին նաև իրենց վերահսկողության տակ առնել ոստիկանությունը: Ազգային հետախուզական կազմակերպությունն (MIT) ազատ էր արձակվելու, դրա փոխարեն, ստեղծվելու էր նոր կառույց, որը գլխավորելու էր գործող ռազմական գեներալը:
Թուրքական մի շարք փորձագետների կարծիքով, 2003 թվականին կարող էր տեղի ունենալ Թուրքիայի Հանրապետության ողջ պատմության մեջ ամենաարյունալի հեղաշրջումը:
