Грузия Online-ի փոխանցմամբ, ընդդիմադիր «Դեմոկրատական շարժման» առաջնորդ Նինո Բուրջանաձեն պատրաստվում է «Հայրենքի դավաճանության» համար դատի տալ նախագահ Միխեիլ Սաակաշվիլիին, ներքին գործերի նախարար Վանո Մերաբիշվիլիին և մի շարք այլ բարձրաստիճան պաշտոնյաների.
«Վրաստանի իշխանությունները պնդում են, թե դեռևս երկու ամիս առաջ գիտեին, որ մոտակայքում կան 4000 զինված անձինք, որոնց թիկունքում կանգնած են ՌԴ Գլխավոր հետախուզական վարչության հատուկջոկատայինները, և որ այդ ամենը ֆինանսավորվում էր Ռուսաստանի կողմից ու հանդիսանում էր Պուտինի պլանը։ Այդ դեպքում ինչո՞ւ նրանք այդ մասին ոչինչ չէին բարձրաձայնում։
Ինչո՞ւ իշխանություններն այդ մասին ոչինչ չէին հայտնում այն անձանց, ովքեր հավատում է՛ին և ե՛ն, որ պայքարում են հանուն Վրաստանի։ Ինչո՞ւ նրանք նախապես չէին ձերբակալում այդ ամենի կազմակերպիչներին։
Այդ տեղեկատվության «քողարկմամբ» իշխանությունները հարվածի տակ են դրել երկրի անկախությունն ու ինքնիշխանությունը։ Եթե դա այդպես է, ապա դա հանցագործություն է սեփական ժողովրդի հանդեպ։ Ես պահանջում եմ, որպեսզի դատախազությունը քրեական գործ հարուցի այն անձանց հանդեպ, ովքեր հստակ գիտեին, որ պատրաստվում էր «պետական հեղաշրջում», և ոչինչ չեն ձեռնարկել անմեղ մարդկանց զոհվելը կանխելու համար»։
Հիշեցնենք, որ ընդդիմության ցույցի ցրումից հետո Վրաստանի ՆԳՆ-ը հրապարակել էր մի աուդիո ձայնագրություն, որում Բուրջանաձեն իր որդու հետ քննարկում էր Վրաստանում պետական հեղաշրջում իրականացնելու մանրամասները։ Զրուցակիցները հանգել էին այն եզրակացության, որ հեղաշրջման համար նախապատվելի տարբերակը եգիպտական սցենարն է, և որ իրենց անհրաժեշտ է 30,000 ցուցարար ու մինչև 500 զոհ։
