Այսօր Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում տեղի ունեցավ լրագրող Սիրանույշ Պապյանի՝ ընդդեմ ոստիկանապետի հայցի քննությունը:
Ոստիկանապետ Վլադիմիր Գասպարյանի փաստաբան Տիգրան Աթանեսյանը նախորդ ամիս հայտարարեց, որ այլևս չի ներկայացնի ոստիկանապետ Վլադիմիր Գասպարյանի շահերը դատարանում: Իր հայտարարության մեջ Աթանեսյանը նշել էր. «Վերջին օրերին իմ և Արմեն Սողոմոնյանի նկատմամբ կատարված հանցավոր արարքի հետևանքով առաջացած հանրային հետաքրքրության շրջանակներում, որոշ անձանց կողմից փորձ է կատարվել շահարկել ՀՀ ոստիկանության պետ, գեներալ-գնդապետ Վլադիմիր Գասպարյանի անունը, որի շահերի ներկայացումն եմ իրականացնում մի քաղաքացիական գործի շրջանակներում: Փաստաբանների պալատում առկա բացասական երևույթների դեմ իմ պայքարում, ընթացող քրեական դատավարական գործընթացներում Վ. Գասպարյանի անվան շահարկումը բացառելու համար, իմ և պարոն Վ. Գասպարյանի կողմից փոխադարձ համաձայնություն է ձեռքբերվել իմ կողմից իր շահերի ներկայացուցչությունը այսօրվանից դադարեցնելու մասին: Ցանկանում եմ հայտնել իմ խորին երախտագիտությունը ՀՀ ոստիկանության պետին ցուցաբերված վստահության համար»:
Վլադիմիր Գասպարյանը նոր փաստաբան ունի՝ Հունան Տեր-Վարդանյանը:
Դատարանը նախորդ դատական նիստը նշանակել էր ապացույցներ ներկայացնելու` սահմանված ժամկետ տրամադրելու համար:
Դատական այս նիստը դարձյալ հետաձգվեց մինչև հունիսի 19-ը, քանի որ պատասխանող կողմը հարցեր էր տալիս, որոնք այս դատական նիստի ընթացքում չավարտվեցին:
Սիրանույշ Պապյանի փաստաբան Դավիթ Ասատրյանն «Առաջին լրատվական»-ի հետ զրույցում նշեց, որ ըստ էության որևէ դիրքորոշում չի փոխվել, պատասխանողի ներկայացուցիչը հայցադիմումը չի ընդունում, և որևէ նոր հիմնավորում չկա։ «Ավելին՝ կողմը շարունակում է նույն գործընթացն իրականացնել, այսինքն՝ հիմնվել այն առարկությունների վրա, ինչը դատական նիստի ընթացքում ի սկզբանե ներկայացվել էր»,- ասաց Դավիթ Ասատրյանը:
Փաստաբանի խոսքով՝ արդեն ութ նախնական դատական նիստ է կայացել. «Նախնական դատական նիստերի նմանօրինակ քանակությունը և հետաձգումը իրականում խախտում են ողջամիտ ժամկետում անձի արդար դատաքննության իրավունքը, և անկախ դատարանի կայացրած որոշումից՝ կարող ենք արձանագրել, որ անձի արդար դատաքննության իրավունքը խախտված է»:
