Սիրիական ընդդիմադիր կոալիցիան այսօր ծրագրում է Սիրիայի ժամանակավոր վարչապետ նշանակել՝ բարձրացնելու համար միջազգային վստահության մակարդակն իր հանդեպ՝ Վաշինգտոնի և Մոսկվայի միջև սիրիական ճգնաժամի լուծման դիվանագիտական խաղի ֆոնին: Այս մասին հայտնել են Սիրիայի ազգային կոալիցիայի ներկայացուցիչները:
Միջազգային ինտենսիվ բանակցությունների շաբաթվա արդյունքում կոալիցիայի ներկայացուցիչները հայտնել են, որ համաձայնության են հասել, և անկախ իսլամիստ Ահմադ Տումեհը կնշանակվի ապստամբների կողմից վերահսկվող տարածքների քաղաքական առաջնորդ, քանի որ այդ տարածքներում տիրող քաղաքական քաոսը խաղաքարտ է դառնում Ասադի կառավարության ձեռքին՝ փոխանցում է Reuters գործակալությունը:
«Մենք կնշանակենք նոր վարչապետ: Դա կդառնա մեր օրակարգի առաջին կետը»,- ասել է ընդդիմության ներկայացուցիչ Խալեդ Սալեհը՝ կոալիցիայի 115 անդամների հետ հանդիպման առաջին օրվա արդյունքներով:
Սալեհի խոսքով՝ ռուսական նախաձեռնությունը լռում է ամենակարևոր հարցի՝ վերահսկողության ապահովման հարցի շուրջ: Նա շեշտել է, որ քաղաքական լուծումների ձեռք բերումը չի ազատի ռեժիմին 1466 անմեղ քաղաքացիական անձանց սպանության պատասխանատվությունից:
