Այսօր՝ մայիսի 16-ին, վճռական փուլ կմտնի Մալաթիա-Սեբաստիա համայնքի թաղապետ, ԱԺ պատգամավոր, լուսահոգի Վահան Զատիկյանի երկու որդիների՝ Սեդրակի և Անդրանիկի սպանությունը 100.000 դոլարով պատվիրելու մեջ մեղադրվող Նարեկ Խաչատրյանի գործով դատավարությունը:
Մալաթիա-Սեբաստիա վարչական շրջանի ընդհանուր իրավասության դատարանը՝ նախագահությամբ Ռոբերտ Պապոյանի, կլսի կողմերի մեղադրական և պաշտպանական ճառերը, որից հետո կանցնի խորհրդակցական սենյակ՝ դատավճիռ կայացնելու:
Հիշեցնենք, որ նախորդ նիստի վերջում մեղադրող Վահագն Պողոսյանը դատավարությունում իր դերը կասկածի դնող մի միջնորդություն արեց բացակա պաշտպան Վարդուհի Էլբակյանի փոխարեն: Դատախազը «պաշտպան» դարձավ և գաղտնի՝ պաշտպանված վկա Ահարոն Հակոբյանին վտանգելու միջնորդություն արեց. մինչև հաջորդ նիստը հարցում ուղարկել ոստիկանությանը՝ հանրապետությունից բացակայող վկա Ահարոն Հակոբյանին գտնելու հույսով:
Սա այն վկան է, ում գաղտնազերծել էին սպանության մյուս պատվիրատու Ստեփան Հակոբյանի (ԱԺ նախկին պատգամավոր Լեդի Հակոբ մականվամբ հայտնի Հակոբ Հակոբյանի եղբորորդու) դատավարության ընթացքում՝ չնայած նա խնդրել էր իրավապահներից չառերեսել իրեն մեղադրյալների հետ՝ զգուշանալով հնարավոր հետևանքներից:
Ըստ քրգործի՝ վկա Ահարոն Հակոբյանը իրենց ընդհանուր ընկեր, մաքսային ծառայության մի պաշտոնյայի ուղեկցությամբ սպանության պատվերի գումարի մի մասը վերցրել էր պատվիրատուներ Ստեփան Հակոբյանից և Նարեկ Խաչատրյանից ու սպանությունից ժամեր անց տարել տվել էր մարդասպանին: Եվ այս հանգամանքը համընկնում է գործով ձեռք բերված մյուս ապացույցներին:
Ընդ որում, վերջին նիստերից մեկի ժամանակ այդ վկային ևս մեկ անգամ հարցաքննելու միջնորդություն էր ներկայացրել պաշտպանը, որի լուծումը դատարանը հետաձգել էր մինչև վերջնական դատական ակտով խորհրդակցական սենյակ մտնելը:
Այդ միջնորդությամբ պաշտպանական կողմը, ամենայն հավանականությամբ, հույս ունի հոգեբանական կամ այլ ճնշմամբ ստիպել վկային հրաժարվել Նարեկ Խաչատրյանի դեմ տված ցուցմունքից և անբավարար ապացույցների իմիտացիա ստեղծելով՝ հասնել մեղմ պատժի: Եվ այդ հարցում, փաստորեն, մեղադրողը օգնում է ամբաստանյալին՝ կասկածի տակ դնելով իր հաստատած մեղադրանքը և վտանգելով վկայի անվտանգությունը:
Հավանաբար հենց իրավապահների կողմից ինֆորմացիայի արտահոսքի հետևանքով անհասկանալի պատճառով ու հանգամանքներում «ինքնասպան եղավ» երկրորդ գաղտնի վկան՝ «Արամ Արամյանը», ով այդպես էլ չհասցրեց դատարանում ցուցմունք տալ: Նա պաշտոնապես գաղտնազերծված չէր, և նրա իրական տվյալները հայտնի էին միայն գործով զբաղվող իրավապահներին, դատավորին:
Մեղադրողն այս միջնորդությամբ մատնեց, կասկածի տակ դրեց իրենց. տպավորություն կա, որ մեղադրական և պաշտպանական կողմերը փոխշահավետ գործարքի մեջ են: Դա կպարզվի մեղադրողի պահանջած պատժաչափից. 15 տարվա մեղմ պատի՞ժ՝ ինչպես Ստեփան Հակոբյանին, թե՞ ավելի խիստ՝ որպես մարդասպան գտնող միջնորդի:
Մեկ կարևոր հանգամանք ևս. եթե այս գործին առնչվող որևէ անձի հետ որևէ կասկածելի «դժբախտ» դեպք պատահի՝ ինչպես Անդրանիկ Զատիկյանի, «Արամ Արամյանի»… հետ, պետք է հանցագործների փնտրտուքը սկսել այս գործից տեղյակ այն անձանցից, որոնց նախաքննական մարմինը թողել է ազատության մեջ:
