«Իջևանի միջպետական ճանապարհի փակվելու խնդիրը կապված չէր ճանապարհների վիճակի հետ: Ճանապարհի որակը երկրորդական խնդիր է եղել: Այն ավելի շատ վերաբերում էր միջպետական ճանապարհի կողքի շինությունների դիմացը գտնվող բետոնե արգելափակոցները հանելու խնդրին», – կառավարության նիստից հետո լրագրողների հետ զրույցում ասաց ՀՀ տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը՝ անդրադառնալով մայիսի 10-ին իջևանցիների կողմից Իջևանի միջպետական ճանապարհի փակվելու պատճառներին:
Նախարարը հավաստիացրեց, որ ճանապարհի վերանորոգան աշխատանքներն իրականացվում են և 15-20 օրվա ընթացքում փոսալցման աշխատանքները կավարտվեն:
Բացի դրանից՝ նախարարի խոսքով՝ նաև Հաղարծինի հատվածում երեկվանից սկսվել է կապիտալ շինարարություն և 10 օրվա ընթացքում այդ աշխատանքն էլ կավարտվի:
