ՖԻՖԱ-ի շուրջ ծավալված կոռուպցիոն սկանդալը նոր ընթացք է ստացել և կարող է ճակատագրական լինել արաբական աշխարհի համար: ՖԻՖԱ-ի փոխնախագահ Ջեկ Ուորները, ով մինչև քննության ավարտը զրկվել է որևէ ֆուտբոլային գործունեություն ծավալելու իրավունքից, հրապարակել է իր և ՖԻՖԱ-ի գլխավոր քարտուղար Ժերոմ Վալկեի էլեկտրոնային նամակագրությունը:
Ուորները Վալկեին գրում է, որ Բին Համմամը պետք հանի իր թեքնածությունը, քանի որ նրա ու Բլատտերի պայքարը կարող է հեռուն գնալ ու ցավալի ավարտ ունենալ արաբական աշխարհի համար:
Վալկեի պատասխանը հետևյալն է. «Ես ընդհանրապես չեմ հասկանում` ինչու է Համմամը դրել իր թեքնածությունը ՖԻՖԱ-ի նախագահի ընտրություններում: Ի՞նչ է նա իսկապես կարծում է, որ ընտրվելու շանս ունի, թե՞ պարզապես ցանկանում էր ցույց տալ իր ատելությունը Բլատտերի նկատմամբ: Կամ գուցե կարծում էր, որ կարող է գնել ՖԻՖԱ-ին, ինչպես Քաթարը գնեց աշխարհի առաջնությունը»:
Ժերոմ Վալկեն արդեն հաստատել է այդ նամակի իսկությունը, սակայն ասել է, որ այն կրճատումներով է հրապարակված:
