Քվեմո Քարթլիի մարզային ոստիկանության գլխավոր վարչության քրեական ստորաբաժանման ու պարեկային դեպարտամենտի աշխատակիցները գողական աշխարհին պատկանելության մեղադրանքով Մառնեուլի ու Դմանիսի շրջաններում ձերբակալել են 13 մարդու, որոնք կատարել են Ռուսաստանում ու Ադրբեջանում բնակվող «օրենքով գողերի» հանձնարարությունները: mzk1.ru-ի փոխանցմամբ՝ այս մասին տեղեկացնում է Վրաստանի ՆԳՆ-ի մամլո ծառայությունը:
«Մասնավորապես, 8 հոգուց բաղկացած խումբը ստացել է կոնկրետ հանձնարարություններ Ռուսաստանում բնակվող գողերից մեկից ու կատարել է դրանք, իսկ 5 հոգուց բաղկացած խումբը ղեկավարել է «օրենքով գող» Նադիր Սալիֆովը՝ «Գուլու» մականվամբ, որն իր պատիժն է կրում ադրբեջանական բանտում»,- ասված է հաղորդագրությունում:
Վրաստանի ՆԳՆ-ի տվյալներով՝ 13 ձերբակալվածներից 9-ը անցյալում դատապարտված են եղել տարբեր ծանր հանցագործությունների համար:
Հետաքննությունը կատարվում է Վրաստանի Քրեական օրենսգրքի 223-1 հոդվածի համաձայն, այն է՝ պատկանելություն գողական աշխարհին:
