Մայիսի 5-ի առավոտյան նավթի համաշխարհային գները կտրուկ անկում են գրանցել: ICE բորսայի տվյալներով՝ հինգշաբթի լույս ուրբաթ գիշեր Brent տեսակի նավթի գինը մեկ բարելի դիմաց կազմել է 46.9 դոլար:
Վերջին անգամ նման ցուցանիշ գրանցվել էր 2016թ. նոյեմբերին: Ինչպես հաղորդում է BBC-ի ռուսական ծառայությունը, նավթի գների անկումը հանգեցրել է ռուբլու արժեզրկմանը: Մայիսի 4-ի երեկոյան Մոսկվայի բորսայում դոլարի փոխարժեքն աճել էր 1 ռուբլով՝ հասնելով 58.39 ռուբլու:
Ավելի վաղ հաղորդել էինք, որ նավթի համաշխարհային գները նվազում են «սև ոսկու» գլոբալ գերավելցուկի պահպանման մտավախութունների պատճառով։ ԱՄՆ-ում նավթի արդյունահանումը մեկ շաբաթում աճել է 0,3%-ով կամ օրական 28 հազար բարելով՝ հասնելով 9,293 մլն բարելի։ Լիբիայից և Նիգերիայից ստացվող արդյունահանման տվյալները նույնպես մտահոգություն են առաջացնում, քանի որ այդ երկրները որևէ պարտավորություն չեն ընդունել՝ ուղղված ՕՊԵԿ-ի համաձայնագրի շրջանակում արդյունահանման կրճատմանը։
