Ավտովարորդների պաշտպանության լիգան, մի շարք տաքսի-ծառայություններ և վարորդներ տրանսպորտի և կապի նախարար Գագիկ Բեգլարյանից պահանջում են նախարարության լիցենզավորման հանձնաժողովի հրաժարականը: Այսօր լրագրողների հետ հանդիպմանը Ավտովարորդների պաշտպանության լիգա ՀԿ նախագահ Տիգրան Հովհաննիսյանը նշեց, որ իրենք հայեցակարգ են ներկայացրել ՀՀ նախագահին, վարչապետին, տրանսպորտի և կապի նախարարին` պահանջելով կասեցնել դրամաշնորհային ծրագրերը:
«Տաքսու վարորդ-գծատերեր միավորվելու են այս հայեցակարգի շուրջ: Մենք լուծարվում ենք, իրենք ասում են` գիլյոտինից փող ենք ուզելու, ձեր խնդիրները լուծենք»,- ասաց նա:
Վարորդների համար անհասկանալի է` սեփական մեքենան իբրև տաքսի վարելու համար ինչո՞ւ պիտի 40-50 հազար դրամ ծախսեն, դեռ բնակչին էլ ստիպված լինեն բացատրել, որ 6 կմ-ի դիմաց պիտի վճարի 700 դրամ, և բնակիչն էլ դժգոհ մնա:
Վարորդները դժգոհում են՝ ասելով, որ կատարված «բարեփոխումներով» իրենց ձեռքից խլում են իրենց 18 ժամվա աշխատանքը: Վերջիններս պահանջում են, որ տուգանվելու մասին իրենց տեղյակ պահեն հաղորդագրություններով, չպահանջեն նոր հաշվիչների տեղադրում, եթե դեռ հինը կա, գոնե տաքսու վարորդներին թույլ տան 30 րոպե անվճար կայանել կարմիր գծերի վրա:
«Ստացվում է, որ Երևանի ճանապարհները դառնում են վճարովի, այսինքն` օդից փող են աշխատում: Ճապոնիայի օրինակն են բերում, իսկ գիտե՞ք՝ որքան են այնտեղ թոշակն ու աշխատավարձը»,- դժգոհում են վարորդները:
