«Առաջին լրատվական»-ի զրուցակիցն է Երևանի ավագանու «Ելք» դաշինքի թեկնածու Դավիթ Խաժակյանը։
-Ինչպե՞ս եք գնահատում քարոզարշավի ընթացքը։ Ձեր շփումներն ի՞նչ են ցույց տալիս, արդյոք երևանցիները կվստահեն ձեզ։
-Խորհրդարանական ընտրությունների քարոզարշավի շրջանակներում բակերում քաղաքացիների հետ շփումները շատ ջերմ էին։ Այժմ՝ այս ընտրությունների ժամանակ մենք շատ ավելի ջերմ վերաբերմունք ենք տեսնում, արձագանքները շատ ավելի բուռն են, քաղաքացիները մեծ ոգևորությամբ են մեզ ընդունում ու ողջունում։Այս ընթացքում վերհանվեց մեր և Հանրապետական կուսակցության ծրագրերի բախման կետերը։ ՀՀԿ-ն իր ծրագրով չի ներկայացնում նոր ճանապարհ, որով հնարավոր կլինի Երևանի առանցքային խնդիրները լուծել։ Ուստի մենք տեսնում ենք, որ և թիմի նոր լինելու, և ծրագրի առումով մենք ձևավորել ենք մի դրական առավելություն։ Մենք մեր առաջ դրել ենք մի խնդիր. այն ընտրողները, որոնք ցանկանում են փոփոխություններ՝ գնան ընտրատեղամասեր՝ վստահ լինելով, որ իրենց ձայները պաշտպանված են լինելու։ Աջակցության առումով մենք խնդիր չունենք, ըստ էության, մեծամասնության աջակցությունը զգում ենք։
-Այս ընտրությունները մերժեցին խորհրդարանական ընտրություններին մասնակցած մի շարք ընդդիմադիր ուժեր։ Արդյոք նրանց ձայները կկկարողանա՞ք կոնսոլիդացնել դեպի «Ելք» դաշինք։
-Ես կարծում եմ, որ առնվազն այն ուժերը, որոնք խորհրդարանական ընտրություններին ներկայացնում էին որպես ընդդիմադիր ուժ ստացել են ընդդիմադիր քվեներ։ Եվ ես կարծում եմ, որ այս ընտրություններում ձայները կկոնսոլիդացվեն «Ելք» դաշինքի վրա ու դրանով իսկ այդ փոշիացված ձայները կբացառվեն։ Այսինքն փոշիացված ձայներ չեն լինի ու ընդդիմադիր ձայները մենք կստանանք։ Այս պահին խնդիրն այն է, որ այդ ձայները հասնեն տեղամաս։Մարդիկ պետք է գնան տեղամաս և քվեարկեն։
-Իսկ դուք այդ ուժերից աջակցություն ստացե՞լ եք այս ընթացքում։ Նաև արտախորհրդարական ուժերից արդյոք կան ձեզ սատարողներ։
-Ես տեսնում եմ, որ այն ուժերը, որոնք մասնակցել են խորհրդարանական ընտրություններին և հանդես են եկել ընդդիմադիր դիրքերից, այժմ դիտորդի կարգավիճակում են հայտնվել։Չնայած այնպես չէ, որ մենք որևէ աջակցություն էինք ակնկալում,բայց գոնե ինձ համար զարմանալի է այդ լռությունը, որովհետև եթե իրենք հավակնում էին խորհդարանում լինել ընդդիմադիր ուժ, առնվազն պետք է անմասն չմնային հիմա ՝գոնե աջակցեին։Հատկապես, որ «Ելք» դաշինքը ներառական ուժ է և չի բացառում ընդդիմադիր ուժերի հետ համագործակցությունը։ Մենք մեզ փակ չենք պահում և թշնամիներ չունենք, բայց դա իրենց որոշումն է։
-«Հայազն» կուսակցությունը կարծես ձեզ սատարելու որոշում ուներ..
-«Հայազն» կուսակցության տարբեր ներկայացուցիցչներ մասնակցել են մեր երթերին և իրենց աջակցությունը որպես քաղաքացիներ, որպես քաղաքական ուժցույց են տվել։
-Դուք ասացինք, որ խնդիր է լինելու ընտրողներին տեղամաս բերելը, որպեսզի քվեարկեն ձեր օգտին։ Մտավախություն չկա՞, որ «ՍԱՍ»-ի ձայնագրությունների, տնօրենների հայտնի սկանդալների ֆոնին հուսահատությունը էլ ավելի է մեծացել՝ «Միևնույն է ոչինչ չի փոխվելու» ավանդական տարբերակով։
-Մեր քարոզարշավը հենց դրան է նվիրված։ Երբ բակեր ենք գնում՝ ասում ենք՝ մեզ հետ են այն պատգամավորները, ում դուք եք ընտրել։Այսինքն նրանք կենդանի վկայությունն են այն բանի, որ ընտրություններով հնարավոր է արդյունքներ ձևավորել։Այսինքն մեկին ընտրեն ու նա ընտրվի։ Այլ խնդիր է, որ «Ելք» դաշինքի և ի դեմս Նիկոլ Փաշինյանի տեսնեն քաղաքապետի և դա այնքան ցանկալի լինի իրենց համար, որ գնան տեղամաս ու քվեարկեն։ ՀՀԿ-ն մարդկանց ճնշելով, գումարով ավտոբուսներով տանում է քվեարկության՝ իրենք ունեն իրենց կայուն ընտրազանգվածը, որը շատ է, բայց դրանից ավել չեն կարող ձայն մոբիլիզացնել։ Մենք կարող ենք ավելի շատ ձայն մոբիլիզացնել ու աշխատում ենք այդ ուղղությամբ։
