Ավելի վաղ տեղեկացրել էինք, որ այսօր «Արմենիա Մարիոթ» հյուրանոցի «Տիգրան Մեծ» սրահում անցկացվեց ՍԴՀԿ 20-րդ համագումարը:
Գևորգ Պերկուպերկյանը, ով ներկայացավ որպես ՍԴՀԿ հայաստանյան վարչության ատենապետ, լրագրողների հետ զրույցում նշեց, որ Լյուդմիլա Սարգսյանի հետ կապված խնդիրները դեռևս դատական երկրորդ ատյանի փուլում են. «Կնիքի հարց չկա, կնիքն արդեն մեկուկես տարի է՝ մեզ մոտ է։ Լյուդմիլա Սարգսյանը վիճարկում է արդարադատության նախարարության և համագումարի որոշումը, մեր կողմից կա հակընդդեմ հայց՝ գույքի պահանջ, պատմական դրոշ կա, որ պետք է վերադարձվի»:
Պերկուպերկյանի խոսքերով՝ Լյուդմիլա Սարգսյանի հետ տարաձայնություններն առաջացել են այն բանից հետո, երբ նա սկսել է ՍԴՀԿ-ի ներսում ամեն ինչ հարմարեցնել ՀԱԿ-ի շահերին:
Մեր այն հարցին, թե ՍԴՀԿ-ն շարունակելո՞ւ է աջակցել իշխանություններին, չէ՞ որ նախագահական ընտրություններին նրան սատարելու վերաբերյալ հայտարարություն տարածեցին, մեր զրուցակիցը պատասխանեց. «Միշտ չենք սատարել, միայն նախագահական ընտրություններին, այն էլ հստակ նշել ենք, թե ինչու։ Հիմա ամեն ինչ քննարկումների փուլում է:
Նա նշեց, որ Լ. Սարգսյանին համագումարին չեն հրավիրել, որովհետև կուսակցությունից հեռացված մարդկանց իրավունք չունեն հրավիրել, սակայն հրավիրել են մի շարք կուսակցությունների, հասարակական կազմակերպությունների ներկայացուցիչների, ոմանք էլ ներողություն են խնդրել և չեն ներկայացել:
Մանրմասները դիտեք մեր տեսանյութում
