Սեպտեմբերի սկզբին ԱՄՆ-ում հայտնվել է նոր հիպերձայնային զենք: Այն մշակվել է «Ակնթարթային գլոբալ հարված» (CPGS) ծրագրի շրջանակում: Այդ մասին տեղեկությունները հրապարակվել են Հանուն միջազգային խաղաղության Քարնեգիի հիմնադրամի միջուկային քաղաքականության բաժնի ավագ գիտաշխատող Ջեյմս Էկտոնի զեկույցում՝ հայտնում է հարավկորեական KBS հեռուստառադիոընկերությունը:
Խոսքը ոչ միջուկային զենքի մասին է, որը կարող է Երկրի վրա ցանկացած թիրախ խոցել հրամանի ստացումից հետո մեկ ժամվա ընթացքում: Նշվում է, որ դրա մշակման ընթացքում որպես առաջնահերթ թիրախներ համարվել են հյուսիսկորեական միջուկային օբյեկտները:
Նոր զենքի ստեղծման աշխատանքներն իրականացվում են 2000 թվականից: Այն թույլ կտա արագ գլոբալ հարված հասցնել ԱՄՆ-ի տարածքից արձակվող թևավոր հրթիռի տիպի անօդաչու թռչող սարքի միջոցով: Հասնելով հիպերձայնային արագության՝ այն կարող է այնուհետև ծրագրել թիրախները՝ մեկ կամ մի քանի մարտագլխիկներով դրանք խոցելու համար: Նոր հրթիռն առանձնանում է բարձր ճշգրտությամբ:
Զեկույցում ասվում է, որ հիպերձայնային X-51A Waverider առաջին հրթիռի բարեհաջող արձակումը կատարվել է 2011-ին: Այս տարվա մայիսին կատարվել է երկրորդ բարեհաջող փորձարկումը: Ներկայում դեռևս հաստատված չէ այդ համակարգի ներմուծման ծրագիրը, սակայն ներկա աշխարհաքաղաքական վիճակը կարող է ստիպել համակարգը շուտափույթ սպառազինության կազմ ընդգրկել:
