Մայիսի 27-ին, ՀԴՄ-կտրոնների ներդրման գործընթացի կայացմանը նվիրված միջոցառումների շրջանակներում, Երևանի պետական տիկնիկային թատրոնում «Ես պահանջում եմ ՀԴՄ կտրոն» խորագրով ավանդական ռոք-համերգ էր կազմակերպվել։ Այս մասին ասվում է ՊԵԿ այսօր տարածած հաղորդագրությունում։
Համերգի ընթացքում մասնակիցներին և հանդիսատեսին ներկայացվել է ՀԴՄ ներդրման գործընթացի պատմությունը, ինչպես նաև կտրոնների ամենամսյա խաղարկության վիճակագրությունը: Մասնակիցներին պարբերաբար տեղեկություն է տրվել շահած գումարների չափի ու ավտոմեքենաների քանակի վերաբերյալ, հիշեցվել է նաև վիճակահանության նոր կարգի մասին, ըստ որի՝ սկսած մայիս ամսից, ՀԴՄ կտրոններով խաղարկվում է արդեն 15 ավտոմեքենա:
Ձևավորված ավանդույթի համաձայն՝ այս փառատոնի ընթացքում ևս վիճակահանություն է անցկացվել. բոլոր տոմսերի դարձերեսին նշված հատուկ համարներով ռոքի սիրահարների համար խաղարկվել էր 2 «Yamaha» կիթառ: Ռոք-համերգին մասնակցել են «Բամբիռ», «Դոգմա», «Ռոուդ մուվի», «Վոքս» և «Էվա» հայկական հանրահայտ խմբերը: