Ես անհամբերությամբ սպասում եմ, որպեսզի հնարավորություն ընձեռվի օգնել Լեռնային Ղարաբաղի հակամարտության խաղաղ կարգավորմանը: Ինչպես հաղորդում է APA գործակալությունը, այս մասին հայտարարել է ԵԱՀԿ Մինսկի խմբի ամերիկացի համանախագահ Ջեյմս Ուորլիքը Բաքվում տեղի ունեցած մամլո ասուլիսի ժամանակ:
«Ժամանակն է եկել՝ վերջ դնելու տանջանքներին և ատելությանը, որը զգում են ավելի քան 20 տարի»,- ասել է նա:
Համանախագահը նշել է, որ կարևոր է հակամարտությունը լուծել Հելսինկիի ամփոփիչ արձանագրության հիման վրա:
«Ժամանակն է, որ կողմերը քաղաքական կամք ցուցաբերեն և խիզախ քայլեր ձեռնարկեն: Ես անհամբերությամբ սպասում եմ իմ գործընկերների հետ գործունեության շարունակությանը»,- հավելել է նա:
Ուորլիքը նաև նշել է, որ մոտակա ժամանակներս կհանդիպի ԵԱՀԿ գլխավոր քարտուղարի հետ, այնուհետև նախատեսվում են հանդիպումներ ֆրանսիացի և ռուս գործընկերների հետ՝ Նյու Յորքում ՄԱԿ-ի Գլխավոր ասամբլեայի 68-րդ նստաշրջանի շրջանակներում:
Հիշեցնենք, որ Ուորլիքը Բաքվից կմեկնի Երևան, այնուհետև՝ Լեռնային Ղարաբաղ:
