Վանաձորում երթուղային գծերն էլ են Դարբինյաններինը: Քաղաքապետարանն իր պաշտոնական կայքէջում տեղադրել է ներքաղաքային ուղևորափոխադրումներ իրականացնող կազմակերպությունների հետ կնքված պայմանագրերի պատճենները: Ըստ այդմ` համայնքի կողմից (որպես պատվիրատու) քաղաքապետ Սամվել Դարբինյանը պայմանագրեր է կնքել հորեղբոր որդու, քրոջ ամուսնու, որդու սանիկի, իր նախկին վարորդի` համապատասխանաբար` «Դիկտիս», «Պլուտոն», «Ռ և Հ Տրանս», «Բազե-11» ՍՊԸ-ների հետ, որոնք էլ սպասարկում են քաղաքի խոշոր երթուղիները:
«Դիկտիս» և «Բազե-11» ՍՊԸ-ները, ըստ ՀՀ կառավարության էլեկտրոնային ռեգիստրի, քաղաքապետ Դարբինյանի հորեղբոր որդու` Վիկտոր Դարբինյանի և քրոջ ամուսնու` Տիգրան Պապանյանի կազմակերպություններն են:
Ուղևորափոխադրումների ծառայության մատուցման պայմանագրերն, ըստ տեղադրված պատճենների, կնքվել են Դարբինյանին և Պապանյանին պատկանող նշված ՍՊԸ-ների տնօրենների հետ (ոմն Արման Հովհաննիսյան և քաղաքապետի նախկին վարորդը): Իսկ «Պլուտոն» ՍՊԸ-ի դեպքում, որը նույնպես Պապանյանի կազմակերպությունն է, պայմանագիրը կնքվել է անձամբ նրա հետ, ով այս վերջին կազմակերպության միաժամանակ և՛ հիմնադիրն է, և՛ տնօրենը:
Վիկտոր Դարբինյանն ու Տիգրան Պապանյանը, քաղաքապետի հետ ազգակցական ու խնամիական կապից և երթուղիներ սպասարկելուց բացի, քաղաքապետի պաշտոնավարումից սկսած՝ մշտապես պաշտոններ են զբաղեցրել քաղաքապետարանում: Վիկտոր Դարբինյանը քաղաքապետարանի գույքի կառավարման և եկամուտների հավաքագրման բաժնի արդեն նախկին պետն է (բոլորովին վերջերս ազատվել է պաշտոնից), իսկ Տիգրան Պապանյանը շարունակում է ղեկավարել քաղաքապետարանի ճարտարապետության և քաղաքաշինության բաժինը:
Փաստորեն, «դարբինյանները» համայնքային ծառայողներ են, և դրան զուգահեռ շահույթ հետապնդող գործունեություն ծավալելով` «գիծ աշխատեցնելով» խախտել են «Համայնքային ծառայության մասին» ՀՀ օրենքը, որով սահմանվում են համայնքային ծառայողի նկատմամբ կիրառվող սահմանափակումները: Նշված օրենքի 24-րդ հոդվածի «ը» կետի համաձայն` համայնքային ծառայողն անձամբ ձեռնարկատիրական գործունեությամբ զբաղվելու իրավունք չունի:
Մյուս գծատերերի կապը Դարբինյանների հետ չքննարկելով` միայն նշենք, որ քաղաքի մի քանի երթուղիներն ու գովազդային վահանակները սպասարկող «Ռ և Հ Տրանս» ՍՊԸ-ի տնօրեն Յուրի Համբարյանն էլ է «դարբինյանական»: Քաղաքապետի դատավոր որդի Աղասի Դարբինյանը նրա ամուսնության քավորն է: Եվ, ըստ Վանաձորում շրջանառվող տեղեկությունների, նշված կազմակերպության շահույթն էլ սանիկի միջոցով քաղաքապետի դատավոր որդու գրպանն է գնում:
