Փարիզում կիրակի օրը սպասվող նախագահական ընտրությունների առաջին փուլի ընթացքում միայն 896 ընտրատեղամասերից 400-ը ապահովված կլինեն լրացուցիչ պաշտպանությամբ, հայտնում է Le Parisien պարբերականը:
Հինգշաբթի օրը Ելիսեյան դաշտերում ոստիկանների վրա զինված հարձակումից հետո մի շարք քաղաքական գործիչներ քննադատել են քաղաքապետարանին և Փարիզի ոստիկանությանը այն բանի համար, որ ապահովված չէ բոլոր ընտրատեղամասերի պաշտպանությունը:
Քաղաքապետարանում որպես քննադատության պատասխան խոստացել են, որ անվտանգությունն ապահովող աշխատակիցները կուղարկվեն բոլոր ընտրատեղամասեր, որտեղ լինի դրա անհրաժեշտությունը:
Ողջ Ֆրանսիայով կիրակի օրը կբացվեն շուրջ 67 հազար ընտրատեղամաս: Քվեարկության օրը անվտանգությունն ապահովելու համար կգործեն շուրջ 50 հազար իրավապահ մարմինների աշխատակիցներ:
