Հայաստանի Հանրապետության Ազգային ժողովը սեպտեմբերի 9-ի նիստում ձայների 58 կողմ, 17 դեմ և 7 ձեռնպահ հարաբերակցությամբ ընդունեց «Շահութահարկի մասին ՀՀ օրենքում լրացում կատարելու մասին» օրինագիծը:
ՀՅԴ խմբակցության պատգամավոր Արծվիկ Մինասյանը, սակայն, կարծիք հայտնեց, որ կարիք կար օրինագիծը քննարկել՝ հասկանալու համար որոշ մանրամասներ:
«Եթե սա կատարվում է Հայաստանում ենթակառուցվածքների զարգացման համատեքստում, ապա առնվազն պիտի փոփոխություն կատարվի պետական պարտքի մասին օրենքում: Հակառակ դեպքում ստացվում է, որ աջ ձեռքը չգիտի՝ ձախն ինչ է անում: Այսօր Հայաստանում արտարժույթով եկամուտ ունեցող մարդիկ կան, չասենք՝ օլիգարխ, ուղղակի ունևոր մարդիկ. նրանց ասում ենք՝ եթե դու այսօր Հայաստանից ներդրում անես, կհարգենք, եթե դրսից՝ ոչ»,- ասաց նա:
Մինասյանի փոխանցմամբ՝ այսօր շահութահարկը կազմում է 20 տոկոս, այսինքն՝ եթե Հայաստանի ռեզիդենտը ներդրում կատարեր, 20 տոկոս պիտի փոխադրեր պետբյուջե: Ռուսաստանում այն կազմում է 10 տոկոս կամ ավելի ցածր, հետևաբար հայաստանյան ռեզիդենտի համար ավելի շահավետ է Ռուսաստանում հիմնել մի կազմակերպություն, պարտատոմսեր ձեռք բերել, իսկ դրա արդյունքում Հայաստանի բյուջեն կկորցնի հնարավոր եկամուտները:
Ըստ պատգամավորի՝ սա խտրականություն է, ընդ որում՝ առաջին անգամ նման կոշտ խտրականություն կիրառվում է մեր ռեզիդենտների նկատմամբ: «Եթե ցանկանում ենք գրավիչ դառնալ արտաքին աշխարհին, այնտեղից միջոցներ բերել Հայաստան, ես միայն կողմ կլինեմ, սակայն մենք ոչինչ չենք անում: Սա կարող է դառնալ ստվերը քողարկող, Հայաստանի համար արտաքին ավելի ուժեղ ճնշում գործադրելու գործոն: Պատկերացրեք՝ Թուրքիան վերցնում և ձեր բոլոր պետական պարտատոմսերը գնում է. այստեղ չկա որևէ սահմանափակում, չենք խոսում ծավալների և կանխատեսումների մասին, եկել-ասում եք՝ մեզ արտոնություն տվեք»,- ասաց նա՝ նկատելով, որ սա նաև վնասաբեր է ֆինանսական սեկտորի համար:
Մինասյանը համոզված է՝ առանց լուրջ քննարկման նման նախաձեռնությունը կարող է ևս մեկ անգամ անվստահության մթնոլորտ ձևավորել: Գիտակցելով, որ նախագիծը հետ կանչել հնարավոր չէ, Մինասյանը կարծում է, որ պետք էր առանձին քննարկում կազմակերպել, չանդրադառնալ այս հարցին՝ մինչև կառավարությունը լիարժեք մանրամասներ չներկայացներ:
«Ի վերջո՝ մենք կառավարության գերին չենք»,- ասաց նա:
«Շահութահարկի մասին ՀՀ օրենքում լրացում կատարելու մասին» օրինագծի կարգավորման նպատակը ոչ ռեզիդենտ կազմակերպությունների կողմից ՀՀ պետական արտարժութային պարտատոմսերում կատարվող ներդրումների դիմաց ստացվող եկամուտները շահութահարկից ազատելն է, հավասար պայմաններ ստեղծելը, որպեսզի հնարավորություն ունենանք օտարերկրյա հնարավորինս ցածր տոկոսադրույքով և պայմաններով գումարներ ներգրավել:
