Ազգային վիճակագրական ծառայությունը երեկ հրապարակել է 2017թ. մարտ ամսվա Հայաստանի սոցիալ-տնտեսական, նախնական մակրոտնտեսական ցուցանիշները: Եվ ԱՎԾ-ն այդ ամիս 2016թ. մարտի համեմատ արձանագրել է 6,8 տոկոս տնտեսական աճ կամ, իր իսկ տվյալներով, տնտեսական ակտիվություն: Ընդ որում, ըստ ԱՎԾ-ի տվյալների, աճի այս տեմպը սկսվել է հունվար ամսին և գնալով ավելացել է: Իսկ հունվար և փետրվար ամիսներին նախորդ տարվա նույն ամիսների համեմատ գրանցվել էր 6,4 տոկոս աճ:
ԱՎԾ-ի տվյալների համաձայն՝ տնտեսական այդ աճը տեղի է ունեցել արդյունաբերության, առևտրի շրջանառության և ծառայությունների ծավալի աճի շնորհիվ: Հենց այդ ոլորտներն են ամենաշատը աճել առաջին երեք ամիսներին: Այդպիսով արդյունաբերական արտադրանքների ծավալն աճել է 17,2 տոկոսով, բայց ԱՎԾ-ն չի նշել, թե արդյունաբերության հատկապես որ ճյուղն է աճել՝ հանքարդյունաբերությո՞ւնը, թե՞ այլ ոլորտ: Այդ մանրամասները կհրապարակվեն առաջիկա օրերին:
Նույն տվյալների համաձայն՝ առևտուրն աճել է 13,7 տոկոսով: Ի դեպ, կարծիք կա, որ մարտ ամսին առևտրի նման աճը տեղի է ունեցել ապրիլի 2-ի խորհրդարանական ընտրությունների արդյունքում, երբ կուսակցություններն ու ռեյտինգային թեկնածուները տասնյակ միլիոնավոր դոլարներ են ծախսել իրենց ընտրարշավները կազմակերպելու համար, ինչը նպաստել է նման աճին: Հակառակ պարագայում տարվա առաջին երեք ամիսները թե՛ առևտրի, թե՛ տնտեսական այլ զարգացումների առումով միշտ պասիվ շրջան են համարվել: Իսկ ծառայությունների ծավալը՝ 8,4 տոկոսով: 6,9 տոկոսով ավելացել է նաև էլեկտրաէներգիայի արտադրությունը, ինչը նույնպես ենթադրելի է, քանի որ այս տարի մեր երկրում բավականին խիստ ձմեռ գրանցվեց:
Մարտ ամսին անցած տարվա մարտի համեմատ 8,9 տոկոսով ավելացել է նաև արտաքին առևտրաշրջանառությունը: Այս դեպքում թեև դրական միտում կա այն առումով, որ արտահանումը ավելի շատ՝ 10,6 տոկոսով է աճել, ներմուծումը՝ փոքր-ինչ քիչ՝ 8 տոկոսով, այնուամենայնիվ, շարունակվում է պահպանվել արտահանման և ներմուծման ծավալների միջև առկա խիստ տարբերությունը: Ներմուծումը շարունակում է ավելի քան կրկնակի անգամ գերազանցել արտահանմանը: Մարտին կատարվել է 443 մլն դոլարի ներմուծում, մինչդեռ արտահանումը եղել է ընդամենը 215 մլն դոլարի:
Իհարկե, կան ոլորտներ, որոնք անկում են ունեցել, և ամենաշատ՝ 13,5 տոկոս անկում գրանցվել է շինարարության ոլորտում: Տարիներ շարունակ Հայաստանի տնտեսության աճի հիմնական առաջատար ոլորտը վերջին տարիներին անշեղորեն անկում է գրանցում՝ այն դեպքում, երբ մեկ տասնամյակ առաջ 30-40 տոկոս աճ ուներ: 3,7 տոկոս անկում է գրանցել նաև գյուղատնտեսությունը, ինչն այս դեպքում սեզոնայնությամբ է պայմանավորված:
Նշենք նաև, որ ԱՎԾ-ն դեռ չի հրապարակել եռամսյակային ընդհանուր տվյալները: Բայց անգամ հունվար-փետրվար-մարտ ամիսների առանձին տվյալների հրապարակումից ակնհայտ է դառնում, որ այդ կառույցը ցանկանում է այս տարվա տնտեսական աճի համար մեծ թիվ՝ 6 տոկոս ցուցանիշ ցույց տալ: Եվ եթե տնտեսության զարգացման համար ոչ ակտիվ համարվող այս ամիսներին այսքան աճ է ցույց տալիս, ապա նույն տեմպով կարելի է ակնկալել, որ տարվա կեսից այդ ցուցանիշները կարող են այնքան բարձրացվել, որ հանկարծ նորից երկնիշ աճ ցույց տրվի:
Տպավորություն է ստեղծվում, որ ԱՎԾ-ն աշխատում է վարչապետ Կարեն Կարապետյանի կերպարի շուրջ: Չէ՞ որ Սերժ Սարգսյանը Կ. Կարապետյանին վարչապետ նշանակելով՝ հայտարարեց, որ նա պետք է լինի տնտեսական զարգացման և բարեփոխումների խորհրդանիշը: Ահա ԱՎԾ-ն վարչապետի համար նման խորհրդանշական թվեր է ապահովել՝ անկախ այն հանգամանքից, թե իրականում մենք տնտեսական ինչ ակտիվություն ենք ունեցել: Պարզապես ԱՎԾ-ի այս ցուցանիշներին գալիս է ժխտելու Արժույթի միջազգային հիմնադրամի՝ օրերս արած այն կանխատեսումը, թե 2017-2018թթ. ՀՀ տնտեսության համար ընդամենը 2,9 տոկոս աճ է կանխատեսվում:
