Ադրբեջանական Trend լրատվական գործակալության փոխանցմամբ, Միջազգային ճգնաժամային խմբի (ICC) վերլուծաբան Սաբինա Ֆրեյզերը մեկնաբանել է ԵԱՀԿ Մինսկի խմբի ձևաչափի փոփոխման անհրաժեշտության մասին շրջանառության մեջ դրված լուրը.
«Այժմ դրա ժամանակը չէ, քանի որ ԵԱՀԿ Մինսկի խմբի համանախագահները հավատում են, որ շատ քիչ ժամանակ է մնացել «հիմնարար սկզբունքների» համաձայնեցմանը։ Եթե մոտակա ամիսներին այդ համաձայնությունը տեղի չունենա, ապա միջազգային հանրությունը պետք է լրջորեն մտահոգվի, թե որքանով է արդյունավետ բանակցային այդ ձևաչափն ու ընտրված ռազմավարությունը։ Այդ դեպքում նոր ԵՄ-ը ԵԱՀԿ Մինսկի խմբի անդամ դառնալու հնարավորություն կունենա։
ԵՄ-ի շրջանակներում իսկապես քննարկվել է, թե արդյո՞ք արժե ԵԱՀԿ Մինսկի խմբում Ֆրանսիայի համանախագահին փոխարինել ԵՄ-ի ներկայացուցչով։ Սակայն դրա համար անհրաժեշտ է Հայաստանի և Ադրբեջանի, ինչպես նաև մյուս երկու համանախագահների համաձայնությունը։
ԵՄ-ը դեռևս որևէ ռազմավարություն չի ներկայացրել, թե ինչ կերպ կարող է օգնել խնդրի կարգավորմանը, հատկապես եթե «հիմնարար սկզբունքների» շուրջ համաձայնությունը կայանա։ ԵՄ-ը պետք է մտածի և առաջարկի իր կոնկրետ պլանը։ Մինչև հունիսյան հանդիպումը Մինսկի խմբի կազմը չի փոխվի»։
Հիշեցնենք, որ չորեքշաբթի օրը ԵՄ-ը հրապարակեց Եվրոպական հարևանության նորացված քաղաքականության մասին զեկույցը, որում նա պատրաստակամություն էր հայտնել ջանքեր ներդնել ձգձգվող հակամարտությունների կարգավորման գործում։ ԵՄ-ը ցանկություն էր հայտնել ակտիվորեն ներգրավել այն ձևաչափերում (այդ թվում՝ նաև ԵԱՀԿ Մինսկի խմբում), որոնցում նա դեռևս ներկայացված չէ։ Այժմ այս զեկույցը դիտարկում են Եվրախորհրդարանն ու ԵՄ-ի այլ մարմինները։
