Գյումրիում 102-րդ ռազմաբազայի հարևանությամբ գտնվող զինվորական թաղամասում բնակիչները լսելով՝ Դմիտրի Լոշմանովի անունը` խուսափում են խոսել, որոշները, ըստ էության, խուճապահար հեռանում են: Armtimes.com-ը փորձել է ապրիլի 16-ին տանից դուրս եկած և չվերադարձած ռուս պայմանագրային զինծառայող Դմիտրի Լոշմանովի հարևաններից պարզել, թե նրանց ի՞նչ է հայտնի դեպքի վերաբերյալ:
Զինվորական թաղամասում բնակվող ռուս զինծառայողները կտրականապես հրաժարվեցին խոսել armtimes.com-ի հետ, երբ լսեցին Դմիտրի Լոշմանովի անուն-ազգանունը: Իսկ թաղամասի հայ բնակիչները իրարամերժ և կցկտուր տեղեկություններ էին փոխանցում:
Նրանցից մի քանիսը ասացին, որ Դմիտրի Լոշմանովին անձամբ են ճանաչում: Ներկաներից մեկը հայտարարեց, թե իր հարևանն է եղել, ապա անմիջապես հրաժարվեց ասածից և նշեց, որ Դմիտրի Լոշմանովը բնակվում է «Մուշ-2» թաղամասում և իր հարևանը չէ:
«Ես չեմ ճանաչում իրեն: Լսել եմ, որ գնացել է խանութ և չի վերադարձել: Մեր տղեքից մեկը ասում էր, որ իր հարևանն է»,- ասաց զինվորական թաղամասի բնակիչներից մեկը:
Բնակիչներից ոմանք, որպես Դմիտրի Լոշմանովի կացարան մատնացույց արեցին զինվորական թաղամասում գտնվող երկու հանրակացարանները: Սակայն հանրակացարանի հայ բնակիչները armtimes.com-ի հետ զրույցում ոչ հերքեցին, ոչ էլ հաստատեցին Դմիտրի Լոշմանովի այնտեղ բնակվելու հանգամանքը:
102-րդ զինվորական ռազմաբազայի հարևանությամբ գտնվող խանութներից մեկի սեփականատերը armtimes.com-ի հետ ունեցած զրույցում նշեց, որ Լոշմանովը հաճախակի է ճոխ առևտուր արել իր մոտից: Սակայն նա չկարողացավ հստակ նշել` Լոշմանովը բնակվում է զինվորական թաղամասո՞ւմ, թե՞ «Մուշ-2»-ում:
«Ես չգիտեմ, թե որտեղ է ապրում: Հնարավոր է, որ եկել է զորամաս, հետո դուրս է եկել իմ մոտից, առևտուր է արել: Ես ի՞նչ գիտեմ, թե հետո ուր է գնացել»,- ասաց խանութի սեփականատերը:
Հարցին, թե հիմնականում ի՞նչ է գնել Դմիտրի Լոշմանովը, խանութի աշխատակիցներից մեկը ասաց. «Առնում էր հիմնականում պատրաստի ուտելիքներ, ծխախոտ, հյութեր, հաց, գարեջուր, երբեմն` օղի…»,- armtimes.com-ին ասել է խանութի աշխատակիցը: