Հայոց ցեղասպանության մասին պատմող հոլիվուդյան «Խոստում» ֆիլմից ստացված շուրջ 20 միլիոն ԱՄՆ դոլարի հասույթը կուղղվի Լոս Անջելեսի Կալիֆոռնիայի համալսարանի իրավունքի դպրոցում նոր ինստիտուտի ստեղծմանը, հաղորդում է Daily News-ը:
«Մարդու իրավունքների «Խոստումը» ինստիտուտը մեր իրավունքի դպրոցն ու այս համալսարանը կդարձնի մարդու իրավունքների կրթության առաջամարտիկ»,- նշել է իրավունքի դպրոցի դեկան Ջենիֆեր Լ. Մնուկինը: Նա ընդգծել է, որ 20 միլիոն ԱՄՆ դոլարն ամենամեծ նվիրատվությունն է, որ իրավունքի դպրոցը երբևէ ստացել է ինստիտուտ ստեղծելու համար:
«Շատ մարդկանց Հայոց ցեղասպանությունը հայտնի չէ: 102 տարի մշտական ժխտման արշավ է եղել: Մենք հուսով ենք, որ Հայոց ցեղասպանության հարցում առկա մութը ցրելով` կարող ենք շարժվել առաջ և իսկապես առաջատար լինել մարդու իրավունքների հարցում կրթության, ուսումնասիրությունների, քարոզի և կրթաթոշակների գործում»,- նշել է «Խոստում» ֆիլմի պրոդյուսեր, Կալիֆոռնիայի համալսարանի բժշկական դպրոցի մարսողական հիվանդությունների բաժնի համաղեկավար Էրիկ Էսրաիլյանը:
Նոր ինստիտուտի առաջին տնօրենը լինելու է իրավունքի պրոֆեսոր Ասլի Բալին:
«Խոստում» ֆիլմի համաշխարհային պրեմիերան տեղի կունենա ապրիլի 21-ին: Հայաստանի կինոթատրոններում ֆիլմը կցուցադրվի ապրիլի 27-ից:
