Վերաքննիչ քրեական դատարանում ավարտվել է Գեղարքունիքի մարզի Շատվան գյուղի գյուղապետի որդու՝ Տիգրան Աբրահամյանի գործով բերված վերաքննիչ բողոքի քննությունը:
Գյուղապետի 40-ամյա որդին, ով մեղադրվում էր ճանապարհային երթևեկության կանոնները խախտելով՝ վթար առաջացնելու՝ իր մեքենայով մեկ այ մեքենայի բախվելու և երեք մարդկանց մահ պատճառելու համար, Գեղարքունիքի մարզի ընդհանուր իրավասության դատարանի կողմից արդարացվել և տուն էր ուղարկվել:
Արդարացման դատավճռի դեմ վերաքննիչ բողոք էր բերել գործով մեղադրող Պ. Պետրոսյանը՝ պահանջելով բեկանել արդարացման դատավճիռը, Տիգրան Աբրահամյանին մեղավոր ճանաչել և դատապարտել 7 տարի ազատազրկման:
Ըստ առաջադրված մեղադրանքի՝ 2015 թվականի դեկտեմբերի 11-ին, ժամը 18-ի սահմաններում Տիգրան Աբրահամյանն իր «Մերսեդես Բենց» մեքենան Սևան-Մարտունի-Գետափ ավտոճանապարհի 11,8 կմ հատվածում՝ դեպի Գետափ վարելիս, թույլ է տվել ՃԵԿ կանոնների և երթևեկության անվտանգության մասին օրենքի պահանջներին հակասող գործողություններ, իրականացրել է իր վարած ավտոմեքենայի ոչ պատշաճ ու վտանգավոր կառավարում, մառախուղի պայմաններում հաշվի չի առել տեսանելիությունը, չի ընտրել երթևեկության համար անվտանգ ռեժիմ, մեքենան վարել է տվյալ պայմանների համար նախատեսված՝ 19-39 կմ/ժ արագությունը գերազանցող՝ 90 կմ/ժ արագությամբ, ավտոմեքենան դուրս է բերել հանդիպակաց երթևեկելի ուղեմաս, ստեղծել է վթարային իրադրություն: Նա իր մեքենայի առաջամասով բախվել է դեպի Սևան ընթացող, Դդմաշեն գյուղի բնակիչ Գեղամ Ս.-ի վարած «Ֆորդ Ֆիեստա» մեքենայի առաջամասին:
Մեքենաները բախման ուժգնությունից ընկել են դեպի Սևան ուղղության ճանապարհից դուրս գտնվող քարքարոտ, ձյունածածկ հատվածը:
Վթարի հետևանքով «Ֆորդ Ֆիեստայի» վարորդը և երկու ուղևորները՝ ամուսիններ Վահրամ Ս.-ն ու Լարիսա Զ.-ն, տեղում մահացել են:
Տիգրան Աբրահամյանը զանգել է քրոջ ամուսնուն ու դեպքի վայրից հեռացել է վերջինիս «Ինֆինիտի» մեքենայով՝ առանց վթարված մեքենայում գտնվողներին մոտենալու, միայն իմանալով, որ նրանք մահացել են…
Առաջադրված մեղադրանքում Տիգրան Աբրահամյանն իրեն մեղավոր չի ճանաչել:
Որպես կասկածյալ տված ցուցմունքում նա հայտնել է, որ դեպքի պահին մառախուղ է եղել: Ինքը մեքենան իր ուղեմասով, մոտակա լույսերով վարել է 90 կմ/ժ արագությամբ, տեսանելիությունը եղել է 5-10 մետր: Ինքը տեսել է մառախուղի մեջ դեպի իրեն եկող տրանսպորտային միջոցի լույսերը, բայց չի կողմնորոշվել, թե այդ մեքենան ճանապարհի որ ուղեմասով է երթևեկում: Իր մոտ խառնաշփոթ իրավիճակ է առաջացել, ինքը տեղանքում չի կողմնորոշվել, մուտք է գործել հանդիպակաց ուղեմաս: Շուրջ 15 մետր հեռավորությունից հայտնաբերել է դեմ-հանդիման ընթացող սպիտակ ավտոմեքենա, չի հասցրել միջոցներ ձեռնարկել բախումից խուսափելու համար: Մեքենաները բախվել են: Երբ իրեն դուրս են բերել իր մեքենայից, ինքը հավաքվածների խոսակցություններից հասկացել է, որ իրեն բախված մեքենայի վարորդն ու երկու ուղևորները մահացել են:
Հետագա ցուցմունքներում Տիգրան Աբրահամյանն այլ տվյալներ է ներկայացրել՝ ասելով, թե առաջին ցուցմունքը տալիս եղել է դեղերի ազդեցության տակ, ուստի ճիշտ չի վերարտադրել կատարվածը:
Նշել է, որ մեքենան վարել է 90 կմ/ժ արագությամբ իր ուղեմասով, ընթացել է Սևան-Մարտունի-Գետափ ավտոճանապարհով: Տեսանելիությունը եղել է 40-50 մետր: Ինքը 80-90 մետրից տեսել է դիմացից՝ դեպի Սևան ընթացող մեքենայի լույսերը:
Երբ իր մեքենայի ու այդ մեքենայի հեռավորությունը կազմել է 50-60 մետր, ինքը հայտնաբերել է, որ դիմացից եկող մեքենան ընթանում է իր ուղեմասով, գալիս է իրեն դեմ-հանդիման: Ինքը մեքենաների բախումից խուսափելու համար ղեկը ձախ է պտտել՝ ցանկանալով շրջանցել դիմացից եկող մեքենային: «Ֆորդն» էլ այդ ժամանակ մանևրել է դեպի աջ, մտել է իր աջ ուղեմասը: Ինքն այլևս չի կարողացել խուսափել բախումից: Իր կարծիքով՝ «Ֆորդի» արագությունը եղել է մոտ 60 կմ/ժ:
Առաջին ատյանի դատարանում Տիգրան Աբրահամյանն ասել է՝ քանի որ «Ֆորդը» երթևեկել է իր ուղեմասով, ինքը, փորձելով խուսափել բախումից, դուրս է եկել հանդիպակաց ուղեմաս… Ու այդ ժամանակ «Ֆորդն» էլ է վերադարձել իր ուղեմաս… Ինքը սթրես է տարել, «հո քարից չի, մարդ է»:
Տիգրան Աբրահամյանը նշել է, որ ինքը դեպքի վայրից գնացել է տուն, տանն իրեն բժշկական օգնություն է ցույց տվել բժշկականում սովորող որդին: Ինքը մինչև կիրակի գտնվել է տանը: Կիրակի օրը ցանկացել է մեղայականով ներկայանալ ոստիկանություն, բայց ճանապարհի կեսից վատացել է, իրեն շտապօգնության մեքենայով տեղափոխել են «Էրեբունի» հիվանդանոց: Ինքը քննությունից խուսափելու մտադրություն չի ունեցել: Դեպքի վայրից հեռացել է վախի ու ինքնազգացողության վատացման պատճառով: Ինքը մեքենան վարել է սթափ վիճակում…
Տուժողի իրավահաջորդ Եսայի Ս.-ն հայտնել է, որ ավտովթարի հետևանքով մահացած Գեղամ Ս.-ն իր հայրն էր: Դեպքի օրը հայրն իր մեքենայով ընկերոջ՝ Դդմաշեն գյուղի բնակիչ Վահրամ Ս.-ի ու վերջինիս կնոջ՝ Լարիսայի հետ է եղել: Վահրամի խնդրանքով հայրը նրանց տարել է Մարտունի ու Գավառ քաղաքների վարչական տարածքներում գտնվող գյուղերը՝ հագուստ վաճառելու: Ժամը 16-ին ինքը հոր հետ խոսել է հեռախոսով, հայրն ասել է, թե պատրաստվում են Գավառից դուրս գալ և տուն ուղևորվել:
Նույն օրը, ժամը 21-22-ի սահմաններում քրոջ ամուսինը հայտնել է, որ հայրը վթարի է ենթարկվել ու մահացել է:
Հոր հուղարկավորության ժամանակ տարբեր խոսակցություններից լսել է՝ ինչ-որ գյուղապետի որդի «Մերսեդեսով» դուրս է եկել հանդիպակաց երթևեկելի գոտի ու բախվել է հոր վարած մեքենային…
Տուժողի իրավահաջորդ Սոսիկ Ս.-ն հայտնել է, որ ավտովթարի հետևանքով մահացած Վահրամ Ս.-ն իր եղբայրն էր, Լարիսան՝ նրա կինը: Եղբայրն ու կինը աշխատանք չունեին: Լարիսան շորեր էր գործում տանը, այդ շորերը վաճառում էին շրջակա գյուղերում ու հոգում էին իրենց կարիքները: Դեպքի օրը նրանք եղբոր ընկերոջ՝ Գեղամի մեքենայով գնացել էին գյուղերում հագուստ վաճառելու…
Տուժողների իրավահաջորդները Տիգրան Աբրահամյանին նյութական պահանջ չեն ներկայացրել:
Տիգրան Աբրահամյանի քրոջ ամուսին Արտեմ Խ.-ն հայտնել է, որ դեպքի օրը, ժամը 18-ի սահմաններում իր «Ինֆինիտի» մեքենայով ընթանում էր Սևան-Երևան ճանապարհով: Իրեն զանգել են աներորդու՝ Տիգրանի հեռախոսից ու ասել են, որ Նորաշեն գյուղի հարակից ճանապարհին վթար է եղել:
Ինքն անմիջապես շրջադարձ է կատարել ու գնացել է դեպքի վայր: Մառախուղ էր: Դեպքի վայրում շատ մարդիկ էին հավաքվել: Ինքն իմացել է, որ «Ֆորդի» մեջ գտնված երեք մարդիկ մահացել են: Տիգրանին տեսել է քիչ հեռու՝ կիսապառկած: Նա շատ վատ էր զգում, իր նախաձեռնությամբ նրան իր մեքենայով տեղափոխել է Երևան՝ նրա բնակարան… Հետագայում Տիգրանն ասել է. «Տեսանելիություն չկար, չեմ զգացել՝ ոնց, ինչ…»:
Դատաավտոտեխնիկական առաջին փորձաքննության եզրակացությամբ՝ վթարն առաջացել էր Տիգրան Աբրահամյանի կողմից արագությունը գերազանցելու, հանդիպակաց ուղեմաս դուրս գալու՝ ՃԵԿ կանոնների պահանջները խախտելու պատճառով:
Ընդհանուր իրավասության դատարանը միայն ամբաստանյալի տված հետագա ցուցմունքների լույսի ներքո նշանակել է կրկնակի, ապա և դատաավտոտեխնիկական հանձնաժողովային փորձաքննություններ, որոնց եզրակացությամբ՝ «Ֆորդն» էր դուրս եկել հանդիպակաց ուղեմաս, «Ֆորդի» վարորդի կատարած խախտումների հետևանքով էր կատարվել բախումը…
Ընդհանուր իրավասության դատարանը եկել է եզրակացության, որ Տիգրան Աբրահամյանի մեղավորությունը դատարանում չի ապացուցվել, և սպառվել են նոր ապացույցներ ձեռք բերելու հնարավորությունները:
Տիգրան Աբրահամյանը արդարացվել է, երեք մարդու կյանք խլած վթարի համար նրա մեղավորությունը համարվել է չհաստատված: Տիգրան Աբրահամյանի քրեական հետապնդումը դադարեցվել է, նա անհապաղ ազատ է արձակվել դատարանի դահլիճում…
Մեղադրող դատախազի բողոքի հիման վրա գործը քննելով՝ վերաքննիչ քրեական դատարանը՝ Ա. Դանիելյան, Ռ. Բարսեղյան, Կ. Ղազարյան կազմով, ամբաստանյալ Տիգրան Աբրահամյանի պատճառաբանությունները՝ իր անմեղության վերաբերյալ, գնահատել է որպես ոչ արժանահավատ, քրեական պատասխանատվությունից ու պատժից խուսափելու փորձ:
Գործի հետագա քննության ընթացքում նշանակված դատաավտոտեխնիկական կրկնակի ու հանձնաժողովային փորձաքննությունների եզրակացությունները, վերաքննիչ դատարանի որոշման համաձայն, բավարար չափով փաստարկված չեն՝ Տիգրան Աբրահամյանի նկատմամբ արդարացման դատավճիռ կայացնելու առումով և որևէ իրավական հետևանք առաջացնել չեն կարող:
Վերաքննիչ քրեական դատարանը սկզբնական դատաավտոտեխնիկական փորձաքննության եզրակացությունն ու դրանում տեղ գտած հետևությունները բավարար չափով փաստարկված է գնահատել և՝ ամբաստանյալի մեղավորության առնչությամբ իրավական հետևանք առաջացնող:
Վերաքննիչ դատարանն արձանագրել է, որ արդարացման դատական ակտ կայացնելով՝ առաջին ատյանի դատարանը թույլ է տվել քրեադատավարական օրենքի էական խախտումներ, ինչը հանգեցրել է քրեական օրենքի ոչ ճիշտ կիրառման:
Վերաքննիչ քրեական դատարանը բեկանել է Գեղարքունիքի մարզի ընդհանուր իրավասության դատարանի կայացրած արդարացման դատավճիռը:
Տիգրան Աբրահամյանը մեղավոր է ճանաչվել ՀՀ քրեական օրենսգրքի 242 հոդվածի 3-րդ մասով: Նա դատապարտվել է 6 տարի ազատազրկման: Այս պատժին հաշվակցվել է Աբրահամյանի կողմից նախնական կալանքի տակ գտնված 10 ամիս 24 օրը: Տիգրան Աբրահամյանը վերջնականորեն դատապարտվել է 5 տարի 1 ամիս 6 օր ազատազրկման՝ 3 տարով զրկվելով տրանսպորտային միջոցներ վարելու իրավունքից:
Պատժի սկիզբը կհաշվվի Տիգրան Աբրահամյանին փաստացի կալանքի տակ առնելու պահից, երբ վերաքննիչ դատարանի որոշումն օրինական ուժի մեջ մտնի:
