Հյուսիսային Կորեան այսօր առաջին անգամ ցուցադրել է սուզանավերի իր բալիստիկ հրթիռները՝ փոխանցում է Reuters գործակալությունը։
Դրանք առաջին անգամ հանրությանն են ներկայացվել երկրի գլխավոր ազգային տոնի՝ հանրապետության հիմնադիր Կիմ Իր Սենի ծննդյան 105-ամյակի առիթով Փխենյանում անցկացվող զորահանդեսի ժամանակ։ Պետական հեռուստատեսությունը ցուցադրել է «Պուկուկսոնգ-2» հրթիռները՝ դրված բեռնատարների վրա՝ զորահանդեսում ցուցադրության սպասման հերթում։
Որպես գերագույն գլխավոր հրամանատար՝ զորահանդեսն ընդունում է Հյուսիսային Կորեայի առաջնորդ Կիմ Չեն Ինը։
Հյուսիսային Կորեայում զորահանդեսն անցկացվում է Կորեական թերակղզու շուրջ միջազգային լարվածության սրման ֆոնին։
