Սիրիայում ռազմական գործողությունը էականորեն չի օգնի սիրիական ընդդիմությանը Բաշար Ալ-Ասադի դեմ պայքարում: Այս մասին հաղորդում է The New York Times-ը` վկայակոչելով Պետդեպարտամենտի ներկայացուցչին, որն ուղեկցել է պետքարտուղար Ջոն Քերիին Եվրոպա շրջագայության ժամանակ:
Լրագրողների հետ զրույցում Պետդեպարտամենտի ներկայացուցիչը նշել է, որ Սիրիայի դեմ ԱՄՆ-ի հավանական հարձակման դեպքում «ուժերի դասավորվածության էական փոփոխություն չի լինի»:
Նրա խոսքերով` դաժան պատերազմը կշարունակվի, վարչակարգը գնալով մարդկանց ավելի մեծ պակաս կունենա, սակայն բեկումնային պահ չի լինի:
«Մենք Սիրիայի ընդդիմությանը հստակ հասկացրել ենք, որ ցանկացած ռազմական գործողություն` ի պատասխան քիմիական զենքի կիրառման, խիստ սահմանափակ կլինի: Ողջունո՞ւմ են արդյոք նրանք դա: Ոչ, շատերը կցանկանային, որ մենք ավելի հեռուն գնայինք: Նրանք հիասթափված կլինեն»,- ասել է աղբյուրը:
ԱՄՆ-ի դիվանագիտական գերատեսչության ներկայացուցիչը նշել է, որ ԱՄՆ-ն իր եվրոպացի դաշնակիցներին փորձում է համոզել, որ Սիրիայի հանդեպ անգործությունը կհանգեցնի ընդդիմության թուլացմանը և ծայրահեղականների դիրքերի ուժեղացմանը հանրապետությունում:
