Գարեգին Բ Ամենայն Հայոց Կաթողիկոսը ապրիլի 10-ին Մայր Աթոռ Սուրբ Էջմիածնում ընդունել է Ամենայն Հայոց Կաթողիկոսի կողմից սահմանված Հայրապետական կրթաթոշակին այս տարի ներկայացված Հայաստանի բուհերի երեք ուսանողների` ուղեկցությամբ ՀՀ Կրթության և գիտության նախարար Լևոն Մկրտչյանի և Մայր Աթոռի Քրիստոնեական դաստիարակության կենտրոնի տնօրեն Գերաշնորհ Տ. Վարդան եպիսկոպոս Նավասարդյանի:
Ուսման ընթացքում ցուցաբերած բարձր առաջադիմության համար կրթաթոշակ է շնորհվել Սյուզաննա Իսրայելյանին (Երևանի պետական համալսարան, բակալավրի 4-րդ կուրս), Գոhար Մանուկյանին (Երևանի Մ. Հերացու անվան պետական բժշկական համալսարան, բակալավրի 2-րդ կուրս) և Անի Մկրտչյանին (Երևանի Կոմիտասի անվան պետական կոնսերվատորիա, բակալավրի 1-ին կուրս): Վերջիններիս Հայոց Հայրապետին ներկայացրել է Վարդան եպիսկոպոսը՝ հայցելով Ամենայն Հայոց Կաթողիկոսի օրհնությունը:
Ապա Նորին Սրբությունն իր օրհնությունն ու գնահատանքն է բերել ուսանողներին՝ շնորհավորելով նրանց ուսման մեջ արձանագրած առաջադիմության առիթով և հորդորելով նույն ոգով, նվիրումով ու նախանձախնդրությամբ շարունակել իրենց ուսումնառությունը։
«Ուրախություն և հոգու մխիթարություն է Մեզ համար, որ Կրթության և գիտության նախարարության կողմից այսպիսի հնարավորություն է ընձեռվել Մայր Աթոռ Սուրբ Էջմիածնին, որպեսզի իր փոքրիկ ներդրումն ունենա նաև բարձրագույն կրթության ոլորտում:
Սա առանձնահատուկ խորհուրդ ունի Մայր Աթոռի համար՝ աջակից լինել այն ուսանողներին, որոնք ուսումնական տարվա ընթացքում լավագույն արդյունքներն են գրանցել, նրանց բերել Սուրբ Էջմիածնի օրհնությունը», – նշել է Վեհափառ Հայրապետը՝ իր գնահատանքը հայտնելով նաև ԿԳ նախարար Լևոն Մկրտչյանին՝ նախարարության և Հայաստանյայց Առաքելական Սուրբ Եկեղեցու միջև ձևավորված արդյունաշատ գործակցության համար։
Իր խոսքում Գարեգին Բ Կաթողիկոսը, անդրադառնալով կրթության կարևորությանը, Հայրապետական կրթաթոշակակիրներին կոչ է արել ստացած կրթությունն ապագային ծառայեցնել ոչ միայն իրենց անձերի և անձնական բարեկեցության ապահովման համար, այլ նաև ստացված գիտելիքներով ու հմտություններով մասնակից դառնալ հայրենի երկրի առաջընթացին ու ժողովրդի բարօր կյանքի կերտմանը։
Իր հերթին ԿԳ նախարար Լևոն Մկրտչյանն իր խորին երախտագիտությունն է հայտնել Նորին Սրբությանը՝ ընդգծելով, որ բարի ավանդություն է ձևավորվել, որը շատ ոգևորիչ և հիշարժան է կրթաթոշակի արժանացող ուսանողների համար։
Հանդիպման վերջում Վեհափառ Հայրապետը յուրաքանչյուր ուսանողին Աստվածաշունչ մատյան է նվիրել և հանձնել կրթաթոշակի վկայականները։