2016 թվականին աշխարհում մահապատիժների թիվը նվազել է 37 տոկոսով՝ համեմատած 2015 թվականի հետ։ Այս մասին հայտնում է միջազգային իրավապաշտպան Amnesty International կազմակերպությունը՝ փոխանցում է BBC-ն։
Անցած տարի իրագործվել է մահվան 1032 վճիռ, մինչդեռ դրանից մեկ տարի առաջ մահապատժի ենթարկվածների թիվը կազմել է 1634։ Մահապատիժների թվի նվազումը տեղի է ունեցել առաջին հերթին Իրանի ու Պակիստանի հաշվին։
Հաշվարկներում հաշվի չեն առնվել Չինաստանում մահապատժի վերաբերյալ ցուցանիշները, քանի որ այդ երկրի վերաբերյալ հստակ տվյալները բացակայում են։ Ենթադրվում է, որ Չինաստանում մահապատժի է ենթարկվել ավելի շատ թվով մարդ, քան մնացած բոլոր երկրներում միասին վերցրած։
2006 թվականից ի վեր առաջին անգամ առավել մեծ թվով մահապատիժներ ունեցող երկրների ցուցակի հնգյակում ԱՄՆ-ը չի հայտնվել։ Այժմ հնգյակն այսպիսի տեսք ունի՝ Չինաստան, Իրան (567 մահապատիժ), Սաուդյան Արաբիա (154 մահապատիժ), Իրաք (88) և Պակիստան (87)։
Եվրոպայում և Կենտրոնական Ասիայում մահապատիժը գործում է միայն երկու երկրներում՝ Բելառուսում և Ղազախստանում։
Ներկայում մահապատիժները չեղարկված են 104 երկրներում։ Համեմատության համար՝ 1997 թվականին նման երկրները 64-ն են եղել։
