Խորհրդարանական ընտրություններն արդեն անցյալում են, ինը քաղաքական ուժերից հինգը դուրս մնացին, չորսը կարողացան հաղթահարել անցողիկ շեմը:
Թեմայի շուրջ «Առաջին լրատվական»- ի հետ զրույցում Երևանի ավագանու «Բարև Երևան» խմբակցության ղեկավար Անահիտ Բախշյանը, ով ևս պատգամավորության թեկնածու էր՝ «Ազատ դեմոկրատներ» կուսակցության անդամ, նշեց. «Ես գիտեմ, թե մենք ինչու չանցանք: Քարոզարշավի կեսից զգում էի, որ ինչ-որ բան այն չԷ: Դրան նպաստեցին շատ-շատ հանգամանքներ: Այն, որ ժողովուրդը, այնուամենայնիվ, իր ճանաչած անհատին, թաղային «հզորին» է ընտրել, դա փաստ է: Կարելի է ասել՝ ժողովուրդը գնաց ինքնախաբեության՝ ընտրակաշառք վերցնելով և ոչ միայն, վարչական դիրքի չարաշահման, հազար ու մեկ ճնշումների գնացին:
Ամեն քաղաքացի իր մեջ ընտրելու մի մաղ ունի, ամեն մեկի համար այդ մաղը տարբեր չափի անցքեր ունի, այդ անցքերը մեզ համար շատ փոքրացրել էին, և մենք չանցանք: Ժողովուրդն այնքան էլ իրազեկված չէր «Ազատ դեմոկրատներ» կուսակցության մասին»:
Ա. Բախշյանը ժողովրդի իրավագիտակցությունը շատ ցածր է գնահատում. «Եվ նորից գալիս եմ այն եզրակացության, որ քանի դեռ մեր երկրում կրթությունը այն տնօրենների ձեռքում է, ովքեր դառնում են թեկուզ իրենց հարած կուսակցության գործիքները, դժվար է քաղաքացիական իրավագիտակցության գալը, որովհետև այդ տնօրենների գործունեությունը հակապետական է, հակամանակավարժական»:
Ա. Բախշյանի կարծիքով՝ ծրագրեր ներկայացնելու մշակույթ պետք է ձևավորվի և ընտրությունը պետք է լինի ծրագրերի միջև: Նրա դիտարկմամբ՝ պետք է վերանայվի կուսակցությունների ռազմավարությունը, մարտավարությունը, աշխատասիրությունը:
Անդրադառնալով «Ելք» դաշինքի հավաքած ձայներին և խորհրդարանում հայտնվելու հնարավորությանը, Ա. Բախշյանը նշեց, որ հասարակության շուրջ 7 տոկոսը գնահատեց «Ելք»-ի երիտասարդ ավյունը, աշխատասիրությունը: Նա նաև հավելեց, որ ցանկանում է կրթության ոլորտի հստակ օրենսդրական փոփոխություններով դիմել «Ելք»-ին և պատրաստ է համագործակցել:
Մանրամասները՝ տեսանյութում:
