Կոմիտաս 5-ում բնակիչների իրավունքների համար պայքարը շարունակվելու է: «Առաջին լրատվական»-ի հետ զրույցում «Նախախորհրդարանի» անդամ Վարդան Հակոբյանը տեսակետ հայտնեց, որ շինարարության վերսկսումը պատահական չէ:
«Հանրապետության նախագահի երեկվա հայտարարությունը ստվերեց բոլոր եղած խնդիրները, որոնք շատ արդիական էին: Այս խնդիրները մեկ օրում չեն ձևավորվել և մեկ օրում չեն լուծվելու»,- ասաց նա:
Հակոբյանի խոսքով` առնվազն տարիներ են տևելու, որ նրանք կարողանան իրենց մտադրությունն իրականացնել, մինչդեռ ամեն օր իրենք ստիպված են լինելու խոչընդոտներ հաղթահարել, այնպես որ՝ պայքարը չի վերջացել:
«Այն կվերջանա, երբ դառնանք իրավական պետություն, իսկ քանի դեռ չենք դարձել, նման խնդիրներ միշտ կլինեն, որոնց մենք արձագանքելու ենք՝ օրինականության շրջանակներում»,- ասաց նա:
Հակոբյանը նշեց, որ իրենք բնակիչներին չեն ուղղորդում, պարզապես աջակցում են, քանի որ բնակիչը պիտի զգա, որ մենակ չի: Նրա խոսքով` Փակ շուկայից բացի՝ բոլոր տեղերում բնակիչներն իրենց ուժերով են պայքարում:
«Մենք փորձել ենք բոլոր հնարավոր մարտավարական տարբերակները, որևէ մեկը մեզ անօրինականության, օրենքի տառը խախտելու մեջ չի կարող մեղադրել: Քաղաքացիական շարժումը ենթադրում է պայքարի բազմաթիվ ձևեր»,- ասաց Հակոբյանը՝ նշելով, որ իրենք մշտապես բոլոր թեժ կետերում են:
Նշենք, որ այսօր առավոտից կրկին Կոմիտաս 5 են եկել շինարարները և վերսկսել շինարարական աշխատանքները:
