«ՌԴ-ում նախագահներ Սարգսյանի և Պուտինի հանդիպումը և արդյունքում արված հայտարարությունը բնավ սենսացիաների ու շրջադարձների որոնման տեղիք չպետք է տա: Սեփական երկրի ազգային պետական շահերից ու անվտանգության հարցերից բխող հավասարակշռված քաղաքականության մասին մենք բազմիցս ենք խոսել: Եվ խոսել ենք բաց ու թափանցիկ միջազգային բոլոր հարթակներից: Իհարկե, գուցե, կլինեն քաղաքական շրջանակներ, ովքեր առաջին տպավորությամբ իրենց հիասթափությունը կամ զարմանքը կարտահայտեն, սակայն հարկ եմ համարում նշել, որ արտառոց ոչինչ չկա: Մենք ռազմավարական շահերի առկայությունը երբեք չենք անտեսել և շարունակելու ենք հակասությունները բացառող քաղաքականություն իրականացնել այն չափով, ոչ չափով որ դա հանարավոր կլինի անել»,- «Առաջին լրատվական»-ի հետ զրույցում ասաց ԱԺ Արտաքին հարաբերությունների մշտական հանձնաժողովի անդամ, ՀՀԿ-ական Արտակ Զաքարյանը՝ անդրադառնալով երեկ մոսկվայում Սերժ Սարգսյանի արած այն հայտարարությանը, թե «Հայաստանը ցանկանում է միանալ Մաքսային միությանը»:
Իսկ արդյոք Մաքսային միությանն անդամակցելը չի նշանակում արդեն նոյեմբերին Վիլնիուսում ասոցացման համաձայնագրի նախաստորագրման ձախողում: Չէ որ եվրոպական պաշտոնյաններն այդ առումով խիստ մտահոգություն են հայտնում: «Մաքսային միությանն անդամակցելու հեռանկարները չեն կարող բացառել բարեփոխումների այն անշրջելի ընթացքը, որը մեզ ուղղակիորեն կապում է եվրոպական համայնքի և դեմոկրատական արժեքների հետ: Մեր քաղաքական հանձնառությունները, պետության և ժողովրդավարացման, մարդու իրավունքների և ազատությունների ընդլայնմանն ու պաշտպանությանն ուղղված քաղաքականությունը, Եվրամիության հետ ունեցած մեր բազմակողմ ու երկկողմ հարաբերությունները, Արևելյան գործընկերության շրջանակներում համագործակցությունը վստահ եմ, որ շարունակելու են մեզ համար լինել կարևոր: Մեր կայացրած որոշումը պատմական այս փուլում պետության տնտեսական, էներգետիկ և ռազմաքաղաքական անվտանգության հեռանկարներին ուղղված գործընթաց է և այս պարագայում ամենատարբեր գործոններ հաշվի առնելով` մենք մեր հարաբերություններն ենք փորձում կառուցել նաև Եվրասիական տնտեսական տարածքում: Դա չի բացառում և ապագայի համար էլ չպետք է սահմանափակի մեր հանձնառություններն ու ակտիվ երկխոսությունը Եվրոպական միության հետ»,- պատասխանեց Ա.Զաքարյանը:
