Արտակարգ և լիազոր դեսպան Արման Նավասարդյանը կարծում է, որ դիվանագիտական հմտությունները պատշաճ գործի դնելով՝ Հայաստանը կարող է հաջողությամբ անդամակցել և՛ Մաքսային միությանը, և՛ ԵՄ-ի հետ Ասոցացման համաձայնագրին: Նա նման տեսակետ հայտնեց այսօր տեղի ունեցած մամուլի ասուլիսի ժամանակ:
«Պետք է օգտագործել այդ երկու կառույցների հնարավորությունները՝ ոչ միայն օգտվելու դրանցից, այլ նաև մոտեցնելու դրանք: Հնարավոր է՝ ասածիս մեջ հիպոթետիկ բան կա, սակայն սա իմ խորին համոզմունքն է: «Եվ-և» եզրը շրջանառության մեջ առաջին դնողը ես եմ եղել»,- հիշեցրեց Արման Նավասարդյանը:
Հարցին՝ Սերժ Սարգսյանը իրավունք ունե՞ր միայնակ ստորագրելու Հայաստանի՝ Մաքսային միությանն անդամակցելու փաստաթուղթը, դիվանագետը նկատեց, որ նման կարևոր հարցը պետք է հաստատվեր հանրաքվեի միջոցով: «Այդ դեպքում նրա հոգսն ավելի կթեթևանար»:
Հիշեցնենք, որ սեպտեմբերի 3-ին Պուտին-Սարգսյան բանակցությունների արդյունքում Հայաստանը որոշել է անդամակցել Ռուսաստան-Բելառուս-Ղազախստան Մաքսային միությանը:
ԵՄ նախագահող Լիտվայի նախագահ Լինաս Լինկևիչուսն իր հերթին հայտարարել էր, որ Հայաստանը, ընտրելով Մաքսային միությանն անդամակցելու ուղին, արգելափակում է ԵՄ-ի հետ ազատ առևտրի վերաբերյալ պայմանագիրը կնքելու հնարավորությունը:
