Այսօր ԱԺ «Ժառանգություն» խմբակցության պատգամավոր Արմեն Մարտիրոսյանը, անդրադառնալով համաներման խնդրին, հայտարարեց, թե դա այն չէր, ինչ «Ժառանգությունը» սպասում էր:
«Միանշանակ է, որ սա այն չէր, ինչ մենք սպասում էինք»,- նշեց պատգամավորը` հավելելով, որ նախ՝ քաղբանտարկյալները պետք է ավելի շուտ ազատվեին, բացի այդ՝ ընդունելի չէ նրանց այս կերպ ազատելու ձևը: «Այսկերպ չի ընդունվում, որ նրանք ի սկզբանե անմեղ են եղել: Բացի այդ, նրանց հետ միասին համաներմամբ բանտից կազատվեն մարդիկ, որոնք գուցե կարող են վտանգավոր լինել հասարակության համար»,- ասաց Ա. Մարտիրոսյանը։
Նրա խոսքով՝ իշխանությունները գնում են քաղբանտարկյալներին ազատ արձակելու ճանապարհով, քանի որ ի սկզբանե որոշել են կեղծել առաջիկա ընտրությունները: Այսինքն, ըստ Ա. Մարտիրոսյանի՝ քաղբանտարկյալներ պահելով ընտրություններ կեղծելը կնշանակեր պայքար երկու ճակատով, այդ պատճառով էլ իշխանությունը բաց է թողնում քաղբանտարկյալներին, որպեսզի «ավելի ազատ կարողանա կեղծել ընտրությունները»:
Ինչ վերաբերում է երկխոսությանը, ապա, ըստ Ա. Մարտիրոսյանի, դա տրամաբանական է այս իշխանության և ՀԱԿ-ի միջև, քանի որ երկուսն էլ նույն մոտեցումներն ունեն ԼՂ հարցի և հայ-թուրքական հարաբերությունների հետ կապված: «Արտաքին ուժերի կողմից երկխոսությունն ու համաներումը ողջունելը ևս այս կոնտեքստում է»,- ասաց Ա. Մարտիրոսյանը: Նա շեշտեց, որ այդ երկխոսությունը չակերտավոր երկխոսություն է, քանի որ հասարակությունը երբևէ չի բարձրացրել երկխոսության խնդիր:
«Հասարակությունը միշտ բարձրացրել է արմատական բարեփոխումների խնդիրը, և այս չակերտավոր երկխոսության ֆորմատը չի համապատասխանում հասարակության ակնկալիքներին»,- ասաց Ա. Մարտիրոսյանը: