Վրաստանի վարչապետ Բիձինա Իվանիշվիլին հավատացած է, որ «Վրացական երազանք» կոալիցիայի նախագահական ընտրությունների թեկնածու Գեորգի Մարգվելաշվիլին կհաղթի ընտրությունների առաջին իսկ փուլում: Նա նաև դիմել է կոալիցիայի անդամներին, որպեսզի նրանք չմտածեն, թե ամեն ինչ կանխորոշված է, և բարձր ակտիվության կոչ է արել հոկտեմբերի 27-ին կայանալիք ընտրություններին՝ հաղորդում է «Գրուզիա Օնլայն»-ը:
«Ես բացարձակապես համոզված եմ, որ նա կհաղթի առաջին իսկ փուլում, սակայն կհաղթի միայն ձեր ձայների շնորհիվ, կհաղթի միայն, եթե դուք աջակցեք նրան, ինչը հուսով եմ՝ կլինի: Շատ եմ խնդրում, մի՛ ծուլացեք, եկե՛ք ընտրություններին և աջակցեք արժանի թեկնածուին»,- ասել է Իվանիշվիլին:
Նա նաև հայտարարել է, որ իշխանությունը ստանձնելուց մեկ տարի անց իր կառավարությունը «հավանաբար կատարել է տրված խոստումների մեծ մասը»: Նա գովել է Մարգվելաշվիլիին կրթության նախարարի պաշտոնում կայացրած որոշման համար, որով նախատեսվում են անվճար դասագրքեր հանրային դպրոցներում:
Վարչապետը ընդգծել է, որ դատական համակարգը փորձում է ազատվել և իր կարծիքով՝ արդեն ազատվել է նախկին իշխանությունների ճնշումներից:
«Եթե մենք շարունակենք նման տեմպերով, հավատացնում եմ ձեզ… շատ շուտով մենք կկարողանանք և կդառնանք եվրոպական տեսակի երկիր, պետություն»,- նշել է նա: