«ՀԱԿ-իշխանություն երկխոսությունը կարծես թե երկխոսություն է երկու մարդկանց միջև, որոնք մեկը մյուսին չեն լսում: ՀԱԿ-ի կողմից խոսվում է արտահերթ ընտրությունների մասին, իշխանությունն էլ ասում է, որ արտահերթ ընտրություններն ընդհանրապես հնարավոր չեն: Կարծում եմ, որ այս իրավիճակով մենք գնալու են մինչև աշուն, և հռետորիկան երկու կողմից էլ դառնալու է ավելի զգայուն։ Չգիտեմ՝ էլի կհասնե՞նք մոնղոլ-թաթարներին, թե՞ ոչ, բայց հռետորիկան կաճի, քանզի ամեն ինչ գնում է նրան, որ իշխանությունը պատրաստվում է հերթական ընտրությունների»,- լրագրողների հետ հանդիպման ժամանակ արտահերթ ընտրությունների հնարավորության մասին խոսելով, նկատեց ՆԺԿ առաջնորդ Արամ Կարապետյանը:
ՀՀԿ-ական Ռաֆիկ Պետրոսյանն էլ արձագանքեց, որ ընդդիմությունը ևս պատրաստվում է հերթական ընտրություններին:
Կարապետյանն էլ նշեց, թե բոլոր այն խնդիրները, որոնց պատճառով տեղի ունեցավ Մարտի 1-ը, և փետրվարի 20-ին չգրանցվեց ընդդիմության հաղթանակը, դեռևս ամբողջապես լուծված չեն, և լարվածությունն աշնանը սպասելի է:
ՀՀԿ-ական պատգամավորն էլ բացառեց արտահերթ ընտրությունների հնարավորությունը. «Ոչ միայն հիմքեր չկան արտահերթ ընտրությունների, այլ նաև նպատակահարմար էլ չէ, որովհետև նոր ընտրությունները կազմակերպելուն մնացել է ընդամենը 11 ամիս։ Ընդունել ենք շատ հիանալի, գեղեցիկ, ընդդիմության գրեթե բոլոր առաջարկներով Ընտրական օրենսգիրք և պետք է խնդրենք ընդդիմությանը՝ քաղաքակիրթ եղանակով նախապատրաստվեն ընտրությունների ժամանակ հաղթանակ տանելու համար»,- հայտարարեց ՀՀԿ-ական պատգամավորը: