Այսօր «Մեծ ութնյակի» գագաթնաժողովից հետո Լեհաստանի մայրաքաղաք է ժամանում Միացյալ Նահանգների նախագահ Բարաք Օբաման: Այստեղ նա բանակցություններ է անցկացնելու իշխանությունների հետ. քննարկվելու են ռազմական համագործակցության հարցեր, այդ թվում՝ Լեհաստանում հակահրթիռային համակարգերի տեղադրման հարցը։ Օբաման մասնակցելու է նաև Կենտրոնական և Հարավարևելյան Եվրոպայի երկրների երկօրյա հանդիպմանը: Այս մասին հաղորդում է «Ազատություն» ռադիոկայանը:
Քննարկվող հիմնական թեման է լինելու ժողովրդավարության կայացումը տարածաշրջանում վերջին 20 տարիների ընթացքում և այդ փորձի օգտագործումն այլ տարածաշրջաններում, մասնավորապես՝ Մերձավոր Արևելքում և Հյուսիսային Աֆրիկայում:
Հանդիպումն ի սկզբանե ուղեկցվել է սկանդալով: Հանդիպմանը հրավիրվել է նաև Կոսովոյի նախագահ Աթիֆեթ Յահյայային։ Այդ պատճառով Լեհաստան ժամանելուց հրաժարվել են Սերբիայի նախագահ Բորիս Տադիչը և Ռումինիայի նախագահ Տրայան Բասեսկուն, որոնք հրաժարվել են նույն սեղանի շուրջ նստել Կոսովոյի ղեկավարի հետ, քանի որ չեն ճանաչում այդ պետությունը:
Հավաքը սկսվում է այսօր, իսկ Օբաման դրան կմիանա երեկոյան: Հայտնի է, որ այդ հանդիպմանը ներկա են լինելու նաև Բալթյան պետությունների, Գերմանիայի, Ավստրիայի և Իտալիայի ղեկավարները: